為了實現媽媽遺願，我成為了女兒國唐僧: 457

B：「呀爽，你無事吖嘛？頭先見你仆到好似打筋斗咁…」點解我過咗嚟好似重受歡迎咁嘅，而且佢重識嗌我個名，明明我同佢無乜交集。
我決定輕微咁玩下嘢，喺傻仔健面前表演下。
我：「好慘呀，痛到差啲郁唔到…無力行返去紅社嗰邊喇。」我抱住自己嘅膝頭作狀咁講。
B：「真係咁嚴重？使唔使同先生講聲去醫院check下呀，唔好死頂喎。」
我：「咁又唔使，最衰都係我個社嘅魔鬼社長，人哋跌到一仆一轆，佢行埋嚟竟然就係關心我嘅落場分，實在係傷透晒我嘅心呀…如果我係綠社，有妳呢啲天使社長嘅安慰，悲慘嘅命運一定可以改寫！」其實瘟神又無咁嚴重嘅，不過為咗加強對比，就點都要用下誇張手法。
B：「係咁咋，想我點安慰你呀？」
吓？乜真係有㗎！咁我可以點接落去好呢？
玩嘢得嚟有氣勢，失禮嘅同時又要戴返個頭盔，重唔可以令佢尷尬…
我：「如果…只要見到Bubble師姐溫暖嘅笑容，我就會感受到妳傳嚟嘅體溫，咁我嘅傷勢就會不藥而癒…」
應該…都唔係好敏感啫，啲用字…




點知，企咗喺下一行嘅Bubble突然叉起條腰，挺起胸膛望住我，再露出一個意味深長嘅微笑。
B：「交叉仔！」
我：「妳…妳叫我？！」我嚇到舉高雙手投降。
B：「唔叫你叫邊個呀？你唔係叫交叉仔咩？！」
我：「係…但係…師姐妳點解知我呢個名？」
B：「你試下再古靈精怪吖，信唔信我爆晒你啲衰嘢畀Carmen聽！」吓…佢識Carmen？！
我：「Carmen…同妳…係識嘅？」
B：「我同佢同一間小學，佢係我師姐，住埋同一層，有時撞到都會謦下欬，話說前年某一日，佢走嚟問我識唔識我哋學校嘅一個師弟，話佢無端端黐埋嚟，嗰陣我當然唔識你，但由於你個名咁特別，所以就記得嘞。」
我：「妳…知道我同佢啲嘢？」
B：「唔係好知㗎咋，不過以佢個衰妹的性格，估都估到啲啦。」




我：「原來係咁…Bubble師姐，失敬晒。」
B：「咁你而家應該點呀？呀下？」
我：「對唔住，我會收斂㗎喇，親愛嘅綠社社長Bubble師姐！」
B：「唔使咁驚，畀隻腳我，等我呵護下你吖嘛。」
我：「師姐…妳想點呀，我…無乜事㗎喇！」
B：「我想摺埋你隻腳，等個傷口再裂開少少，咁你應該啲體溫就會直線上升。」
我：「感激…萬分！我心領喇，實在受唔起…」
唔通…Carmen識嘅人唔多唔少都有啲變態嘅？