為了實現媽媽遺願，我成為了女兒國唐僧: 455

呢種程度唔使大包，只係簡單喺上面鋪一鋪啫，兩三分鐘搞掂，我自己企返起身，red cross姐姐亦都去返佢嘅原位。
Q：「嗱，我唔扶你㗎，你自己行。」
我：「放心，我明嘅…慢慢行就得。」
Q：「乖喇，今晚返屋企先呵返你。」
乜話，今晚返屋企有女神嘅特別服務？！太幸福喇，我開始感覺到自己嘅傷口有甜蜜嘅汁液慢慢咁滲出嚟。
我：「Queenie妳返去先啦，我搵一搵人。」
Q：「嗯，咁你自己小心啲喇，bye。」
一來我唔想成個看台嘅人關注女神佢點樣陪我，二來我返到去都無得同佢坐，所以我停咗喺綠社度，再慢慢拾級而上。
健：「威啦，全世界睇住你瘟女神，仆街都抵。」
我：「邊有瘟…佢關心下同學啫…」




健：「走呀！死現充，唔想見到你呀！」
我：「唔好咁啦，受傷嘅我需要兄弟嘅呵護。」
健：「妖…作嘔，快啲返去搵你嘅女神。」
我：「我呢啲小人物幾時輪得到坐佢隔籬喎，你就做下好心收留我啦。」我夾硬攝咗個屁股入去。
健：「係呢…你話Queenie送餐飯畀你，就係頭先咁樣成大班人食呀？」
係喎，我都唔記得咗講過個咁嘅大話…
我：「唔知呀，本來無約㗎，都係意外嚟，可能…佢會當係掛，是但啦。」
健：「蝕晒啦，唔係一對一食有乜意思。」
我：「咁我又唔係特別想同佢食飯，無乜關係。」
健：「吓…人哋講一句妳就報三個項目，而家走嚟同我講無乜所謂？O咗。」




我：「玩下啫，佢覺得開心咪陪下佢，費事要佢難落台啦。」
健：「乜你唔係對佢有意思嘅咩？」
我：「咪玩啦，咁難服侍嘅女神你要埋佢，我畀唔起入場費，又無得免費玩嘅，而且又有仔。」
健：「你知就好，頭先四個女神走埋一齊，嗰種氣氛真係恐怖到…係你先敢同佢哋一齊食飯。」
我：「哦，當佢哋無到就得，好似睇住四塊靚女poster食飯咁，你唔係覺得Zilvia正正子嘅咩，頭先做乜唔一齊呀，機會難得。」
健：「咪搞，女神只可遠觀，不可褻玩，喺咁大壓力底下食飯係會影響消化。」
唉，藉口，全部都係藉口，成日咁諗你永遠做毒撚算啦；雖則我都係因為同咗QQ一齊住先會慣晒對住啲咁high class嘅女人。