為了實現媽媽遺願，我成為了女兒國唐僧: 454

我：「Queenie…妳…做乜過咗嚟嘅？」
Q：「落嚟睇下你PK死唔死得去吖嘛。」
我：「死唔去…都衝到線…但好痛痛。」
Q：「咪扮嘢啦你，嗰少少傷…不過你都幾黑仔㗎喎，做乜成日整傷自己㗎。」
我：「我都唔知，識咗妳之後就係咁…」
Q：「你唔係咁都可以賴落我度呀？你上次…細蚊搵你，關我乜事喎。」
我：「講下啫…係呢，妳咁樣落嚟搵我，唔驚俾人講閒話咩？」話晒QQ都係學校女神榜嘅top10，貿貿然咁樣行埋嚟體察我嘅傷勢，看台上面實大把人留意，喺屋企就話扭下計嗲佢啫，公眾場合盡可能都唔想製做任何麻煩畀佢。
Q：「是但啦，好歹你都係為咗我而跑，而且又坐喺我隔籬，又咁啱同一個社，關心下你都正常嘅。」越多藉詞，就顯得越係奇怪。
我：「Queenie，多謝晒妳。」
如果大家有專心睇故仔，應該重記得同一時候係有一個red cross姐姐幫我包緊個傷口，聽到QQ咁講佢唔小心咁笑咗出嚟。




Q：「欸…急救姐姐，可唔可以當無聽過我哋之間嘅對話呀？」
「放心啦，Queenie，我係一個專業嘅急救員嚟。」
Q：「唔該晒妳，不過我同佢真係無嘢㗎。」
「…，係呢，使唔使將佢個傷口交畀妳處理？」
Q：「唔使喇，麻煩晒妳。」
就係咁，我繼續乖乖坐喺度微曲隻腳畀人包紮，QQ就安靜咁踎喺我隔籬陪伴我；佢呢個動作，令我睇到佢條PE褲嘅褲腳條罅仔，望到少少屁股肉同髀罅肉，喺陽光下更加顯得白嫩幼滑；不過我唔敢太猖狂，因為怕急救姐姐會周圍唱我係變態，而且我喺屋企又唔係無得睇，只不過喺呢啲場合係別有一番風味。
「咔嚓。」
我：「嘩…德…德爺你搞乜鬼？」
德：「作為一個攝影師，有人受傷呢啲畫面當然要記錄低啦，一年都唔知有無一次。」
係鬼，影女就影女啦，女神踎喺度咁靚嘅角度我都想影，不過見佢無低炒我就唔講啲乜嘞，而QQ亦都由得佢，影完兩三張佢又跑去第二度繼續佢嘅工作。




我諗，佢一日要跑五千都唔止…