thriXt Qantasy 純文字安眠之作 (New: - U2K - 一直上架): 447

我：「係咁多，麻煩晒哥哥。」
「你唔食呀？」
死！係喎！顧住幫佢哋嗌，自己嗰份都唔記得落添，而且連食乜都未諗好…
我望一望塊牌，就黑椒雞扒腸仔飯啦。
我：「學生餐A吖，飲凍奶茶少甜，唔該晒…咦，點解你知道我係未嗌自己嗰份嘅？」
「哈，一睇就知你俾人恰啦。」講完就揮一揮衣袖行開咗，呢間茶記都幾神奇㗎喎，嘢食又五花八門，個侍應又咁風趣都有嘅。
不過呢度個鋪面係幾大，有成二三十張枱，所以menu厚啲都唔出奇嘅；坐下坐下都越嚟越多我哋學校嘅學生，亦都有其他學校，時不時會有啲目光射過嚟我哋呢邊，但我諗佢哋都預咗同慣。
U女神雖然好惡，但其實佢有一直喺肥豬隔籬幫佢一齊諗，聽到啲地方名包括大網仔、麥邊、泥涌咁，但呢個就唔關我事嘞。
如果，我同QQ兩個人去燒嘢食，唔知佢會點呢…不過日頭怕曬，夜晚又怕蚊，呢啲活動諗落其實唔係幾啱佢，有機會再算啦。
估唔到第一次同QQ返學食晏會係咁嘅環境，四個女神喺齊度，如果無記錯佢哋係分開晒四班，細龜就顧住玩佢自己部電話唔出聲，呢個組合都夠晒奇怪，我唯有唔出聲靜靜地等食物，而本來最雞啄唔斷嘅QQ同Y女神都好似好唔自在無乜講嘢…




為免太尷尬，我執咗啲筷子刀叉羹放入兩杯例水入面沖下；大家係咪會估我有可能發生意外倒瀉水整濕啲女神？咁你地就實在係太過天真喇，係咪唔記得咗小弟做邊行呢？
點知沖沖下嘅時候呢，Zilvia同細龜嘅眼神竟然對上咗！本來我以為佢兩個會即刻好尷尬咁迴避對方嘅眼神，點知無！重一直望住！
呢個時候就連QQ同Yvonne都發現唔妥，氣氛實在係非常之咁古怪，唔通佢兩個係識嘅？
過咗三秒到，Zilvia竟然遞高咗佢隻右手，揮揮手同細龜say咗個hi，再過多兩秒之後，細龜亦都用右手回返個hi畀佢再略略點頭，最後Zilvia露出一個靦腆而不失尷尬嘅微笑。
真係睇到我呆咗，細龜坐我前面咁耐佢都無同QQ say過hi，而家佢竟然…