為了實現媽媽遺願，我成為了女兒國唐僧: 446

豬：「地點有乜所謂呀？有得燒嘢食咪得囉…如果去大尾篤巴希雅或者白石燒烤咪乜都唔使買。」
U：「唔要呀！第一，好無feel，咁不如約喺學校附近啲串燒鋪度食都得啦；第二，星期六嗰啲地方超多人超嘈超雜超大煙味；第三，一啲都唔平兼且嘢食無嚟特別，我唔嫌貴但唔該你問下你啲好同學；第四，唔該你搵笪自由自在可以俾我哋玩下mass game嘅地方，最好有得放下風箏，同埋一定要有行到落去玩嘅海邊！」
豬：「拜託…我都要嗌咗飯先…」
U：「你食嘢唔做嘢，有乜資格食晏呀？」
豬：「叉仔，幫我嗌個…生無可戀飯吖。」
我：「吓？你講緊中文呀，即係乜飯？」
豬：「生無可戀飯！即係粟米肉粒飯！」
我O咗嘴，我剩係知粟米肉粒飯有個花名叫show me your love飯，生無…粟米…乜似咩？
我：「唔食學生餐嗱？」明明學生餐平過其他，有乜理由單嗌一個咁無謂嘅飯嚟作賤自己？
豬：「你睇唔到我咩，攞嚟應景嘛，加多杯凍奶茶唔該。」




Q：「白汁焗海鮮飯，zero檸樂。」
我：「妳對住我講嚟做乜？」
Q：「你負責點菜吖嘛。」
我：「點解係我負責點菜？」
Q：「嗌開有條路吖嘛。」
Y：「鑊仔牛柳餐，六成熟要洋葱汁，羅宋湯走餐包，凍鴛鴦少甜少冰。」
你老味…你班女神食乜春大㗎，麻撚煩到咁嘅！重有呢間茶記，點解會有咁多了能嘢，認真屌咗出聲！
Z：「唔該，煎大蝦拼雜果沙津，熱檸水，麻煩晒阿爽。」咦，佢竟然識嗌我個名嘅，而且重好好禮貌添，呢個實在抵幫，但佢食得咁少嘢會唔會唔夠飽㗎，不過睇佢身型又差唔多。
U：「柱候牛筋腩煲，要凍朱古力，走糖走奶但要夠濃，如果無朱古力就美祿，再唔係就阿華田。」
我心諗…呢班女，對住一個都大鑊，如果日日陪住佢哋應該命都短幾年，朱古力都唔係間間有，美祿就重高難度，走奶換多啲粉唔知會唔會畀待應鏟呢…加埋晏晝就食小菜，女神妳係得嘅。




龜：「學生餐B要意粉，飲熱呵力（Horlicks）」
我：「…」
唉，重慘過背默呀，一陣嗌錯咗實俾人批鬥到傻；我望一望學生餐B係乜，原來係葡汁時蔬雞球飯，分析完之後我就叫咗個店小二嚟落單，好在我都係飲食界嘅一員知道啲protocol，溝通上唔會有太大難度，唔使兩分鐘就落晒所有單。