thriXt Qantasy 純文字安眠之作 (New: - U2K - 一直上架): 442

龜：「犀利呢，一落場就有牌囉。」
我：「好彩啫，或者你又試下玩都可能會有。」
龜：「唔會啦，運動呢啲都唔啱我。」
豬：「未必嘅，有啲嘢唔試下唔會知。」
我攞住塊銅牌喺手嚟望一望，感覺…都好似唔錯，不過我唔係一個招搖嘅小朋友，除非我攞多兩個牌啦，所以我都係除返塊牌出嚟放入袋。
咦…部電話有message喎。
Q：『傻瓜，恭喜晒！』個Message已經係廿分鐘前send嚟，即係大概我衝線嗰一刻；衰QQ，喺學校嗰陣就扮晒嘢，返到屋企先好好教訓妳。
豬：「叉仔，你做乜喺度淫笑呀？」
我：「吓？無呀…唔關你事。」
我：『低B妹，我又唔會攞埋電話去跑，點覆妳？』




等咗半分鐘佢就覆咗我。
Q：『我知呀，咪等你返嚟先囉。』
我：『對唔住呀，我攞唔到銀牌。』
Q：『唔緊要啦，你已經跑得好快！』
我：『咁我嘅奬品呢？』
Q：『你咪攞咗塊牌囉…』
我：『妳咪扮唔記得好喎！』再加個惜惜emoji。
Q：『返屋企再算…唔得閒理你，遲啲再傾～』
然後我send咗三個反轉哈哈笑畀佢…
算，喺學校都係唔好同佢咁friend，盞自己攞嚟煩，於是我就同肥豬細龜兩個繼續欣賞沉悶嘅千五米，八百米，男女子甲乙丙組賽事；喺看台睇，永遠都會覺得場上面嘅人跑得好慢，但落到場，先知道感覺完全係兩回事，明明同前面嗰個差嗰一兩米，都不知鬼死咁難追。




陸運會係一個好消耗體力嘅活動，我唔係指運動員，而係一個好特別存在嘅人—德爺。佢走個不停咁叫啲靚做嘢，又要不停搬腳架set機，呢邊女子八百衝線佢跑大半個場過嚟影，轉頭佢又跑返去影女子跳遠預賽…果然能者多勞；烈日當空之下，佢由八點半曬到而家但無半點疲態，睇嚟佢先係終極鐵人。
講起烈日當空，天氣真係越嚟越熱，啲女亦都越著越少布；好多除咗件jacket出嚟，又或者綁咗喺腰，有啲準備參賽又或者啱啱比完賽嘅女仔除咗條track褲出嚟都無諗住著返；始終，陸運會其實係重正過便服日嘅大髀日！
豬：「係呢，聽聞你好似唔係男仔嚟喇喎。」
我：「吓？你咁講…係乜嘢意思？」
豬：「你咪扮嘢啦，即係大個仔呀，係咪呀？」
如果俾著以前，我可能真係會沾沾自喜E牙鬆螯咁答係，但我而家就覺得有啲尷尬，我同個女仔十六歲都未夠，純粹玩咗排就分手，講出嚟絕對唔係啲有幾光彩嘅事嚟囉…
我：「做乜…問我啲咁尷尬嘅事呀…」
剩係肥豬都重好啲，中間加個宅男喺度，氣氛實在係有咁奇怪得咁奇怪。