為了實現媽媽遺願，我成為了女兒國唐僧: 441

佢兩隻手抱住咗我個膊頭…妖！男人老狗眾目睽睽之下搞乜鬼呀，一陣啲女以為我哋基呀…
健：「呼呵…呼呵…」好似就死咁樣…
好似真係唔多掂，我托住咗佢條腰，大概抖咗半分鐘佢條氣先順返少少，呢個時候第尾嗰條粉腸終於到最後直路準備衝線；鬥志可嘉呀下，最叻就係搞到我爬唔到頭，拜託你下年唔好再參賽…
我：「好啲未呀？慢慢行得唔得？」佢輕輕點頭。
佢搭住我膊頭，我扶住佢條腰，慢慢行返去休息區，一坐低佢對腳就不由自主咁喺度震。
我：「無嘢吖嘛？抽筋？」
健：「未…抖下…就得…」
呢個時候有個helper遞咗兩罐寶礦力過嚟，我攞上手然後開咗一罐畀佢。
健：「咳！咳咳咳咳…」
我：「喂！咪飲咁急呀，一陣跑步死唔去飲野濁死咗，實大把人笑死你。」




佢無回應我，睇嚟真係攰到死咗，將啲精力燃燒殆盡，於是我哋就咁樣坐喺度抖。
坐咗五分鐘到，佢個樣終於回復正常。
我：「對唔住呀，如果唔係你叫我嚟玩，呢塊銅牌就係你㗎喇。」
健：「應該唔會…因為根本無諗住跑咁快…就係知係你條仆街仔…所以先追住你…如果唔係可能跑第五第六，點都好…恭喜晒。」
我：「下次同Bubble姐姐講，攞到牌要扭抱抱啦，咁就唔使諗住要追我。」
健：「下次？人哋中五喇，下年都唔會係佢啦…」
我：「可能下年又有個靚靚師姐叫你玩呢。」
健：「下年先算，我今年已經完成任務，可以收工休息。」佢伸咗一個大大嘅懶腰，睇嚟好疏肝。
我喺度諗，如果我可以準備得好啲…如果我一開始唔陪阿健而跑快啲…如果我早啲發現第尾條友阻住地球轉而喺掟彎位嗰陣用力少少將自己拋開…如果我買對靚啲嘅跑鞋…如果QQ話我攞到金牌就同我拍拖…
睇嚟…都係唔好發咁多夢。




不過…如果QQ一直住喺度，我每年都會為佢玩陸運會，如果佢想嘅話。
「阿爽！你重喺度嘅！快啲去準備啦，頒奬喇！」
有個PE阿Sir氣沖沖咁走過嚟刮我。
我：「吓…哦…咁快嘅？」
「甲組都跑完三千喇！快啲去中央看台呀。」
健：「去攞牌啦，我都返上去先喇。」
從來都唔活躍喺校內活動嘅我，就好似個無知嘅細路，跟住啲先生嘅指示，呆下呆下咁行上頒奬台，烏低身畀副校長幫我掛上個銅牌，之後德爺幫我哋影相，再落台走人；我對於攞牌呢件事其實無乜特別嘅興奮，只係一直諗緊點解銀牌條友跑得咁快，同埋今晚要點樣同QQ惜惜。
返到上看台，瘟神喺度同隻豹合照。
瘟：「阿爽，恭喜晒呀！第一次落場就攞牌，真係好叻仔！」
我：「嗯…多謝，都係好彩啫。」




Q：「係囉，唔踢你都唔去玩，分返半塊牌畀我就差唔多。」
我：「乜喎，我呢啲係為人禮讓，將啲機會留返畀其他同學啫。」
Q：「係呀係呀，知你好人喇，差嗰幾吋都唔跑埋佢，係要讓塊銀牌畀人哋。」
我：「我…我…呢個係技術性問題。」
瘟：「唔緊要啦！重有兩個項目，有機會可以儲齊一套牌！繼續畀心機！不過跨欄我都有份玩，希望你可以手下留情啦，哈哈…」
我：「一定一定…咁我返上去先喇。」
攞得塊銅牌，我都唔係幾好意思同佢哋打混咁多，如果我有金牌嘅話；哼，我一定會黐埋去文書財政姐姐度影相，實行激死QQ為止。