為了實現媽媽遺願，我成為了女兒國唐僧: 421

Q：「乜…嚟㗎…定係，係乜嘢值得紀念嘅日子，妳…媽咪第一次帶你食麥樂雞？」佢凝望住我。
第一次又好，最後一次又好，都唔重要嘅…
我：「唔使咁凝重喎…今日，純粹係M記十蚊有九件麥樂雞嘅大日子！」QQ變成兩眼反白，差唔多激到死去活來咁嘅樣。
Q：「原來…係咁樣，但抵都唔使買咁多呀，食唔食得晒呀？重有好鬼熱氣囉…」
我：「嘻嘻，妳都鍾意食㗎嘛，要食一定食得晒嘅，我諗住食完今餐可以三個月唔使再食麥樂雞。」講真，就算唔係QQ我可能都買廿七件當飯食，因為平時六件實在到喉唔到肺。
Q：「所以就淨係得麥樂雞？」
我：「係呀，正所謂…嚟到麥當勞呀，食乜卵嘢…」
Q：「麥樂雞呀…麥樂雞…」
我：「嘩！原來妳識玩㗎？我哋一路猜一路食吖！」
Q：「玩你個頭呀，低B，死都唔會同你玩埋呢啲弱智嘢，小學嗰陣見過啲男仔玩咋嘛…」




我：「原來…妳小學就有啲咁有品味嘅男同學。」
Q：「你咪黐線啦，今日神神化化咁，唔係要我乾哽麥樂雞呀，快啲斟zero畀我啦。」
我：「服侍妳都得，但做個麥樂雞嘅動作嚟畀我睇下先！」
Q：「咪畀咗裙底你睇囉，重想點呀？！」
我：「求下妳啦，做畀我睇下吖。」
然後佢死魚眼咁郁咗兩下…
我：「妳要有啲生氣，嗌埋出嚟，咁啲麥樂雞先會好味㗎！」其實係要趁熱食先好味。
Q：「麥樂雞呀！麥樂雞！」
動作…我唔形容喇，爛作者話只要讀者諗住QQ個樣一齊做麥樂雞呢個動作就可以真切體會到。
我：「好可愛嘅麥樂雞呀！愛死妳喇…」




呢一刻我覺得自己係全世界最幸福嘅小朋友。
Q：「妖，假到死，信你呀，記住加冰呀。」
我：「知道喇！女皇陛下。」
Queenie…對唔住，好抱歉只有喺呢啲咁白癡嘅場合我先有勇氣同妳講愛妳…
我：「有六包醬㗎，自己揀啦，如果可以就剩返兩包畀我囉嚟煮嘢食啦。」
Q：「好明顯你就想我剩咖喱同韓式辣醬啦，係呢兩樣有兩包咋嘛。」