為了實現媽媽遺願，我成為了女兒國唐僧: 408

史無前例（其實有，請參閱飛揚兄作品），由聖誕前寫到新年後竟然可以嘔到四十萬字出嚟，所以…爛作者命令我唔好搞咁多嘢節外生枝，然後我就返學（默孔乙己），返學乘三，返學返工，返工乘二，返學乘二；嘩！犀利呀，咁就嚟到再下個星期二，二月尾，陸運會嘅前一日；人生第一次覺得時間可以行得咁快，對我嚟講都算係一件好事，因為下次返工就有得出新年啲糧喇，實在係好感動，重有老竇又已經畀咗生活費我，鳴鳴鳴…
各位小朋友唔好學我，要好好珍惜時間知唔知？你哋一月係考試季節（我就一早考完，嘻嘻），QQ話睇小說之餘都要努力讀書，成績唔好嘅要加把勁，考第一嘅唔可以讕叻，應該早啲溫埋下年要讀嘅嘢，只要你比別人行得快，考完DSE嘅時候應該已經可以讀埋大學三份之二個學位，呢個年代學習唔使靠先生，網上資源足夠你得到需要嘅嘢。（由於爛作者儲稿，所以你哋都考完…）
我：「原來啦啦隊練習真係幾好睇。」
嚟到中三我先第一次認真睇，以前我都唔鍾意花任何無謂時間喺學校，睇嚟Miss咗好多嘢。
健：「梗係啦，聽日就係正場嚟㗎喇，後日重有表演比賽，今日係最後一日練㗎喇。」
其實唔止啦啦隊，田徑隊都喺度圍住學校跑緊，籃球場有人練緊短跑，重有人set咗個跳高架步畀同學玩；補充少少資料，星期三四係陸運會，星期五係乜春發展齊齊偷懶日，簡單嚟講係有連續五日嘅時間可以忘記學業，連啲先生都玩埋一份。
康：「咁美好嘅場面…點解我睇得一陣就要走…」
唔係講笑，今日真係未出發先興奮，十足十全世界都唔想放學咁；早幾日都話係得啲鹹濕仔同業內人士先會留喺度昅女，今日嘅雨天操場可以話係座無虛席，全世界不論高低form都唔避嫌咁喺度睇女，因為表演真係十分之精彩。
啦啦隊本身就喺度鬥大聲dem beat叫囂，誓要砌低其他社咁，啲師兄師姐同幹事亦都吶喊助威埋一份，加埋呢個陸運會對中六嘅同學嚟講係考DSE mock前嘅最後一個大型校內活動，個個都最後一擊咁盡情享受中學校園生活嘅光輝，玩到黐晒線；溝女嘅溝女，吹水嘅吹水，啲師姐攞晒電話出嚟selfie都無人理，重有啲大唔透嘅喺度玩猜皇帝…唔知，Carmen佢而家又過成點呢？