thriXt Qantasy 純文字安眠之作 (New: - U2K - 一直上架): 407*

調較字數今章偷懶，順道提大家女廁故有update。

我：「的確又係嘅，以我所知除咗我之外無一個同學可以十一點打後重喺條街度遊嚟遊去。」
Q：「嘻嘻，成條街都係屬於我哋㗎喇。」
我：「咁我哋去球場度跑囉，好唔好。」
Q：「嗯，但我想問下…球場係咪無晒人㗎喇？」
我：「球場十點就熄燈㗎喇，正常打波嘅人都已經走晒，要hea都唔會hea到咁耐，不過可能會有啲無謂人…但放心啦，有我喺度保護妳一定唔會有事嘅。」好自然我就拖起咗佢隻手帶佢行過去。
去到球場，好好彩一個人都無，QQ除咗件hoodie入面又係嗰套戰鬥格，我諗無乜男人受得住，如果我唔喺度嘅話真係擔心會遇到啲變態佬騷擾佢，所以就由我嚟做醜人肩負起做變態佬呢個艱鉅嘅責任啦…講笑，係一齊跑步啫。
本來諗住睇佢跑就算，但既然自己都報咗，慢跑著乜裝束又唔係太重要，所以我都一齊跑；不過我同佢速度唔同㗎，佢係要練四百米嘅速度，跑下抖下咁…
跑咗半個鐘多啲，我就拖住佢隻手仔返歸，明明每次佢俾我拖住個樣都會好開心，但諗緊乜就只有佢自己先會知道喇。




Q：「好啦，你快啲去沖涼先呀。」
我：「咦，妳竟然會咁好讓我？」
Q：「唔好講到我次次都要霸先咁，其實我就無爭過嘅，只不過係通常你都會慢吞吞所以我先快手快腳入去沖先啫，我頭先瞓咗晏覺，而家都唔攰，聽朝重要返學㗎，你快啲入去沖呀！」
我沖完就到佢沖，然後我就上床覺豬，今日真係好攰，睡眼惺忪中我發覺好似有人惜咗我額頭一下，不過就唔知係發夢定係真實喇。
自此，我哋多咗個活動就係夜一夜落去球場跑步，不過當然，佢都係因為準備陸運會先咁神心啫。