為了實現媽媽遺願，我成為了女兒國唐僧: 396

究竟佢係咪處女座㗎，單單幾粒青豆就搞到好似潔癖同強迫症咁，不過唔係搞著我又無乜嘢嘅；話時話我都未知佢幾時生日，無端端問佢又好似有啲怪，按道理佢應該事前會等我知㗎啦…
最終，佢收集咗所有青豆喺隻羹上面，然後望住佢哋冥想，我懷疑緊佢係咪喺心入面爆粗咒駡緊…
我：「喂！妳做乜鬼呀？！」
出乎我意料之外，佢將隻羹放咗入口，將一半嘅青豆倒咗落個口入面。
Q：「嗚嗚…我又唔係完全唔食，只係好唔鍾意炒飯入面有青豆。」佢一路痛苦（口趙）住咁講。
我：「唔使勉強自己喎，唔想食咪掉咗佢。」
Q：「我驚你唔開心吖嘛…浪費食物嘅話，我食晒啲青豆先，咁就會剩返一碟好嘅炒飯。」
唔知點形容，眼前呢個女仔確實令我又愛又恨；我搶咗佢手上嗰隻匙羹，將剩返嘅一半倒晒落我個口度，我唔係為咗要食佢口水尾，亦唔係想佢食我口水尾，呢樣嘢喺我哋嘅關係當中已經變咗無意義。
我：「咁辛苦做乜，畀我食咪得。」放完入口我還返隻羹畀佢。
Q：「食有幾辛苦喎，都係一啖啫，長痛不如短痛吖嘛，揀出嚟嗰下重辛苦。」




女仔嘅思想實在係好難理解，亦都有可能係佢先係咁；好在佢出身優良，屋企應該照顧得佢好好，俾著係阿康呢啲，如果喺老竇老母面前揀飲擇食應該會俾人磢（㨘）鑊甘，佢成日都話佢老母會因為小小事就發脾氣鏟佢，睇到佢用緊部四吋芒Android電話就感受到佢嘅無奈。
食完飯就去返工，好快迎嚟第二日嘅星期日，今日我同QQ都留喺屋企，返工前都會日夕相對，主要活動就係做功課同俾佢對下我做齊功課未，雖然佢喺其他方面係無乜器用，但對我學業幫助的確係幾大。
我：「呼！終於做晒功課，又溫埋孔乙己。」
Q：「我喺度諗緊，有無地方可以畀我做下運動。」
我：「實有㗎，不過你喺呢附近出現就好易撞到其他同學，但得妳一個人都無乜所謂嘅。」
單單係一個阿健已經夠麻煩，星期六都好少少，QQ可以話返學校玩下活動或者搵下同學，星期日學校就真係基本上無人，佢出現喺呢條邨一個人做運動實在唔多正常。
我：「又或者，妳可以搭幾個站去附近運動場跑嘅，都唔係話好遠。」
Q：「好戇居吖嘛，搭車嘥時間又嘥錢，但又無理由跑去運動場，成件事就係搵自己笨。」
我：「其實妳可以約Yvonne佢哋做運動㗎，咁咪無咁悶囉，妳唔係話佢哋都有報陸運咩？」
Q：「佢哋…好麻煩…唔好搞我，行街睇戲就得。」




女仔就係麻煩，女仔同女仔之間都會互相嫌煩…