為了實現媽媽遺願，我成為了女兒國唐僧: 382

Q：「唔車呀，都無幫助嘅，你話過惜我㗎，以後都唔準咁呀，有乜咪直接講囉，一齊住重單單打打…」
我：「我只係想妳喺學校對我好啲啫…」
Q：「喺其他人眼中，我只不過係同你坐咗兩個零月啫，以前又唔係熟，使唔使friend到攬頭攬髻咁呀，況且我對其他仔都差唔多㗎啦，你當係我衰囉，加埋大部份人都知我有仔嘅，對你咁好你係咪想我俾人唱啫。」
我：「嗯，我諗我明㗎喇。」
Q：「你咁想我喺學校對你好，你咪努力啲囉，畀心機讀書攞到好成績，幫手做下校務受先生同其他同學歡迎，提升下自己地位先，如果唔係我無端端同你行得咁埋，你自己都覺得怪啦。」
我：「哈哈…妳由我啦…我繼續做坐你隔籬嘅低B仔就已經心滿意足。」
Q：「咁咪係囉，劇本係咁寫，跟住嚟演咪無問題囉，又唔係要你喺屋企都咁，都唔知你呷乜鬼醋。」唉…我都好想知我哋嘅未來劇本會係點。
我：「其實學校入面係咪有好多男仔追妳㗎？」
Q：「上年多啲囉，今年啲人知道咗我有男朋友都收斂咗少少，你又唔使諗到個個都好似狂蜂浪蝶咁約我去後樓梯表白…唔係所有人都係咁嘅，不過好多時有啲小動作，佢哋趌起條尾你就會估到佢想點嗰隻囉，例如一次學校活動見到面就問你攞電話嗰啲，又或者失驚無神借啲意send message嚟，祝你生日快樂然後左問右問，調查下你有乜興趣，再扮幽默風趣咁講下爛笑話，重有啲以退為進，扮到對你無興趣，等你覺得佢係純social而放低戒心，但佢哋會成日煩住你，例如時不時讚你啲IG相有幾好J，串下我生日情人節有乜禮物收，好似想攪盡腦汁戳到我對佢哋有興趣咁，當然都重有人盲摏摏衝過嚟直接表白啦，總之乜人都有，奇形怪狀咁。」
我：「受歡迎真係好…妳返學同我返學好似兩個世界咁。」




Q：「無乜咁好㗎咋，有時都好煩。」
我：「妳乜都有就梗係咁講，女仔無人睺嘅滋味妳邊有機會體驗喎。」
Q：「咁又唔使衰到無人睺嘅，我覺得平平常常，有一兩個男仔識得真心欣賞自己就好夠…不過無辦法啦，鬼叫我天生麗質難自棄，係辛苦啲㗎喇，呵呵。」妳隻衰妹…分明…不知幾enjoy，扮晒嘢。
我：「我想問下，妳以上所講…嗰啲男仔追妳嘅辦法，係咪都唔會有用㗎？」
Q：「梗係唔會有用啦，咁鬼odd…除非個女仔發姣本身係仔都想食，又或者佢本身嗒你糖啦，如果唔係…作為一個女仔，點解要無端端鍾意你喎，呀，重有一個原因，可能個女仔想玩你，黐飲黐食，扮到考慮下同你發展，其實係收你做兵甚至係當你ATM咁㩒。」