thriXt Qantasy 純文字安眠之作 (New: - U2K - 一直上架): 369

我：「哎呀，唔講喇，妳唔好問我呢啲嘢啦，我寧願妳鬧我懶好過…」
鄧：「又唔係嘅，你個人細鬼大真係好清楚呢個世界點運作，有時背面就係咁黑暗。」
我：「講笑㗎咋，唔好信呀，出面好多壞男人，妳係好女仔，我都唔想睇到妳受傷。」
鄧：「吓！？我使唔使你嚟提醒呀，陰功，如果我唔知又點教書呢，你不如顧掂自己啲成績先，同埋叫你個女神唔好俾人呃重實際啦。」
做乜咁大反應，我真係有啲擔心佢…
我：「得喇得喇，做學生係唔應該擔心先生嘅，妳一定已經有分寸，我專心做課後。」
鄧：「嗯，做完就攞過嚟教員室畀我啦。」
我：「我重要做多陣喎，會唔會阻妳放工？」
鄧：「我要改簿呀！唔拎返屋企改呀！」
呢個Miss真係…俾佢教都唔知算唔算係我哋嘅福份，但同佢謦欬係幾開心嘅，可惜佢無教高form…但睇佢個樣教高form實教到裙拉褲甩。




終於我好努力咁睇多一次篇課文，用盡我小腦所理解到嘅嘢寫晒出嚟，雖然唔知啱唔啱，但至少我盡咗力；望住一行行嘅字係幾有實在感嘅，而且認真做起上嚟都唔係好嘥時間，總好過平時眈天望地，最怕就係答非所問俾Miss Tang話我亂咁填啲字入去就樣衰。
做完課後就去搵Miss，啦啦啦。
我：「Miss，我嚟交功課喇，妳睇睇。」
鄧：「哦，真係多咗好多行字喎，不過你啲字可唔可以寫好啲呀，打風咁，又唔係要你趕。」
我：「哈哈…顧住想填返啲內容就越寫越快添。」
鄧：「OK啦，以後就自己畀心機做喇，唔好唔記得做功課，我希望可以見到你同Queenie嘅功課係有兩種唔同嘅風格，可以討論但唔使學足佢。」
我：「其實中文科啲題目，係咪一定答越多字就越好，我見佢哋閱讀理解同作文都水蛇春咁。」
鄧：「絕對唔係，詞不達意寫再多都無用。」
我：「但係妳又經常建議我哋要寫多啲嘅？」
鄧：「咁係因為你哋普遍心態都係太懶，好似有分都唔想攞咁，答中文題嘅精髓係貼題，用字精練（鍊/煉），言簡意賅，用最少時間，最短句子表達最多意思，但係如果你哋連第一步寫晒啲嘢出嚟先都唔肯，又點去改進呢？你哋嗰啲兩三行係叫空洞，濫竽充數，絕對唔會高分，其實我都會擔心啲女仔，平時一定用好多時間慢慢睇同寫，到公開試就會趕唔切好易失手。」