為了實現媽媽遺願，我成為了女兒國唐僧: 368

我：「好奸嘅Miss…但其實我勤力咗，對妳嚟講都無影響㗎，呢間又唔係名校。」
鄧：「係㗎，唔好太多人唔合格就得，而且你寫少啲嘢我重改得輕鬆啲，望兩下就可以是但寫個乙-或者丙+喺度，你知唔知改Queenie啲作文幾辛苦，改一篇等於其他人兩篇。」
我：「咁妳重叫我增加妳工作量？」
鄧：「因為我覺得你有啲潛質啫，想知道你畀心機會點，可能會拍得住Queenie。」
我：「做乜對我咁好，就算係，我又唔會交多啲學費畀妳嘅。」
鄧：「唔知呀，我覺得，如果你以後攞到好成績，然後成世都會感謝我，我就會好開心。」
我：「吓…大把叻嘅學生啦，有乜價值啫。」
鄧：「係，本來就有人天生叻，有人勤力，有人可能佢家長教得重好過啲先生，個學生成績好其實未必關我哋事，尤其係教初中，年年都打亂班，大部份都只係教一年就換人，可能過兩年已經唔記得咗你哋叫乜名，其實都幾悶下，但係我覺得你幾得意，攞嚟做下實驗得唔得？」
我：「乜唔係覺得我曳咋咩…」
鄧：「唔使同我講，唔好爆鑊要我孭就得，畀我安安心心過埋呢幾個月，衷心祝福你哋下年嘅班主任好運。」




我：「唔使擔心佢，我絕對唔會再俾先生嚟家訪。」
鄧：「係呢，Queenie呢排同佢男朋友重有無…」
我：「妳自己問佢，我唔會出賣朋友，亦乜都唔知，我只係被獨留在家嘅兒童，唔係佢監護人。」
鄧：「嗯，千祈唔好同人講呀。」
我：「無嘢好講，佢只係坐我隔籬位嘅麻煩女神。」
鄧：「有時我會喺度諗，如果我重係讀緊書，被迫要同一個男同學同居，到底會係點嘅體驗。」
都話㗎啦，佢真係無乜邊忽似先生，如果唔係要搵錢佢應該想做學生多啲。
我：「妳而家大可以光明正大搵個男朋友同居，雙宿雙棲，恩恩愛愛，茍茍且且…」
鄧：「你個死仔包…真係好想揼扁你。」
我：「Miss，呢個年代唔興體罰㗎喇，雖然我就唔會投訴妳嘅，但係咁樣係解決唔到問題㗎。」




鄧：「哼，咁…你對溝仔又會唔會有啲乜高見呢？」
我：「溝仔呢，當然易如反掌，女追男隔重紗㗎咋，一字記之曰，擘…大…個口得個窿，我點會識答妳喎，我又唔係基嘅。」
鄧：「唔得喇…忍唔住…要拍扁你。」