為了實現媽媽遺願，我成為了女兒國唐僧: 356

Q：「豬仔豬仔，呢度有個鹹濕變態佬蝦我呀，你會保護我㗎可，係呀，我信你㗎喇。」
我：「妳同隻豬講嘢呀…咁低B嘅…」
Q：「乜低B呀！呢啲叫天真可愛無邪呀！」
我：「唔怪之得會俾男朋友氹咗隻豬走啦，原來係天真嬌啲friend嚟，唔通妳都係黑…」
Q：「你試下再講，我揼到你下面變膶腸吖嗱。」
我：「你原諒我啦…天真可愛嘅小妹妹。」
Q：「乜你唔會同玩具講嘢嘅咩？例如用啲機械人打架嗰陣…」
我：「哈哈…好多年前咪會囉，小學嗰陣喺樓下文具鋪玩爆旋陀螺都會同其他小朋友一齊嗌嘈到拆天，不過而家呢…我諗我會對住超市個貨架唸咒語叫啲貨減價多啲。」
Q：「但我見你打傳說有時都打到鬼殺咁嘈。」
我：「嗰啲真人嚟㗎，又唔係死物，通常都係屌啲隊友喺緊要關頭唔嚟幫手走咗去。」




Q：「唓，唔開咪佢哋又聽唔到，同死物有乜分別？你又控制唔到人哋點玩，咁認真做乜。」
我：「咁又唔係呀，如果我同呀健呀康面對面打，都會好嘈㗎，呀康成日縮沙俾我同呀健兩個真人打，不過佢而家俾屋企禁制無得打機。」
Q：「你哋咪重低B，打機都咁認真，好心就攞啲精力嚟讀書啦，你話係咪呀，豬仔？」
我：「豬仔唔識答妳問題㗎。」
Q：「點會喎，我係豬仔，我識講嘢㗎！你都同我講嘢吖！」QQ扮到把聲豬仔咁同我講嘢，一路喺度郁豬仔嗰兩隻手。
我：「…豬仔你好…佢個名就係叫豬仔呀？咁悶嘅…」
Q：「叫豬仔有乜問題，維尼個好朋友都叫豬仔。」
我：「我知呀，但妳呢隻都唔係嗰隻豬仔。」
Q：「咁我叫乜名好呀？交叉仔哥哥。」
我：「吓…妳想我幫佢改名呀？」




Q：「又係你話叫豬仔悶，咪畀個名佢囉，我都無諗過原來可以幫佢改名。」
我：「哦，咁佢係一隻豬…豬…就叫吉百利啦。」
Q：「吓…吉百利，乜嘢邏輯嚟㗎？」
我：「無㗎，豬仔咪諗起朱古力，然後諗起我今日喺超市見到貨架上面鋪滿好多紫色嘅吉百利…」
Q：「你有無咁鍾意超市呀…」
我：「本來無嘅，但妳嚟咗之後呢…我成日都要去入貨買畀妳食，不知不覺間就…我都控制唔到。」
Q：「知你對我好喇，多謝你，叫吉百利…都唔錯吖，聽落好似好吉利，都幾可愛，呀，你知唔知呀，吉百利係全球第二大嘅朱古力公司嚟㗎！」
我：「哦，而家知喇，妳咪又係咁鍾意朱古力。」