thriXt Qantasy 純文字安眠之作 (New: - U2K - 一直上架): 353

我：「乜妳有咁認真㗎咩？諗住攞牌呀？」
Q：「咁我又無預攞牌，攞唔到都可以有貢獻。」
我：「就係妳講嗰一分？落去行個圈都有啦。」
Q：「唔係㗎，你哋睇就金銀銅牌啫，實際上係第一名七分，跟住係五四三二分，其餘一分，如果我攞一個第四一個第五，已經等於一個銀牌，好似你嗰啲三千米無乜人玩，隨時落場都有兩分。」
我：「呢個世界真係複雜…」
Q：「同埋就唔可以太樣衰吖嘛，係咪？我呢啲落得場玩，全世界都睇住㗎。」
我：「係睇住妳心口啫，鬼得閒睇住妳名次。」
Q：「喂…你係咪當其他女同學死㗎。」
我：「都唔知有乜好鬥，平時玩開運動嗰啲就話啫，普通人落去咪湊下熱鬧咁，又無奬金分嘅，都唔知啲社長咁hard sale做乜。」
Q：「唉，咁既然參加得，就要用個heart去玩㗎啦，如果自己都唔enjoy咁重有乜意思喎，同埋啲社長…嗯，可能有內鬥㗎，輸咗個社長有機會俾其他幾個罰。」




我：「吓，咁無聊？係咪有盤口㗎，街外人買唔買得？我可唔可以買自己跑贏傻仔健？」
Q：「咪玩啦，鬥都係鬥總分啫，或者好似四社接力呢啲大項目，如果輸咗呢…可能，有機會Bubble姐姐要畀其他社長揸波波咁。」
我：「嘩！係真㗎？我都有動力做社長喇。」
Q：「講下啫…唔知呢，佢哋高中生係會玩得癲啲，我聽聞，傳返嚟，上年有個師姐輸得幾甘下。」
我：「咁輸乜呀？」
QQ擘大個口得個窿用手喺前面戳下戳下。
我：「唔係咁都得呀？重成世界嘅？」
Q：「我都唔知，你都唔好同人講。」
我：「咁妳啲姐妹呢，使唔使又鬥過妳死我活？」
Q：「哈，都有人玩嘅，不過全部好醒水無撞項目，所以唔存在競爭問題。」




我：「唓，妳哋真係吖，平時唔係成日喺度爭出風頭㗎咩，做乜嚟到關鍵時刻就避開晒？」
Q：「係咁㗎啦，個個都係得把口，你估真係有人想拼個你死我活咩，Yvonne話要去文華low tea講咗兩年都重未去到，我都唔諗住會成事嚕。」
我：「乜佢屋企唔係有錢嘅咩，相對上唔係好貴啫，幾百蚊食一餐嘅話。」對比起QQ對鞋同手袋…
Q：「唔知，無細心研究過，剩係知住私人樓，但如果佢屋企未供完嘅話就…呵呵，理得咁多吖，有人窮扮有錢，有人有錢扮窮，有人有錢但屋企唔俾使，有人有錢但飾演一個扮有錢嘅窮人，有人無錢但飾演一個扮窮嘅有錢人，表面睇唔到啲乜，正如我呢排使少咗錢，但佢哋唔會覺得我唔掂。」
我：「有無咁辛苦呀…其實妳係咪應該諗下要換過班朋友，去撈下第二啲圈子呢？」
Q：「講就易，你估呢…啲村姑，啲超厚眼鏡宅女，同啲油淋淋會唔會show我吖嗱？」
我：「的確，又好似水溝油咁嘅。」
Q：「不如你又去黐下啲學霸，運動健將，學校活動啲活躍份子呀，等你個人積極啲。」
我：「唔好玩我啦…返學已經好攰，重搞咁多…」
Q：「所以咪話囉，你係邊類人身邊就係邊類人，物以類聚，近豬者肥呀。」




我：「咁點解我會黐咗埋嚟妳度㗎…」
Q：「咁啱坐隔籬㗎咋，如果唔係我打死都無可能問你，應該而家重喺舅父屋企抑鬱緊。」