為了實現媽媽遺願，我成為了女兒國唐僧: 352

我：「傻妹，食唔食mum mum呀？」
佢仍然係同一個動作郁都唔郁下，我細細聲咁喺佢側邊試下佢係咪熟睡中，我諗M到唔會導致不省人事或者休克掛，如果佢喺我屋企仙遊咗都唔知可以點算，係咪要跟埋佢駕鶴西飛？
Q：「你就傻妹！」原來無事，重識窒返我。
我：「咁…使唔使煮嘢妳食？定我自己食？」
Q：「係無乜胃口，但點都要食啲嘢。」
我：「煮碗雲吞畀妳好唔好？暖下個肚。」
Q：「嗯，你整完就叫我起身啦。」
唉，真係任性嘅女人，自己啲衫又唔洗，嘢食唔識煮，M巾要我幫佢買，生活費要我打工幫佢搵，都唔知佢有乜鬼用…但只要我一諗起佢嘅好，就會義無反顧咁無微不至照料佢，我知佢鍾意食雲吞王，一包十隻我分咗八隻畀佢，自己就兩隻再加五香肉丁加菜加兩個蝦子麪…
雲吞喺我屋企算好伙食㗎喇，特價都十七八蚊包，比得上一盒OK飯飯店咁滯，當然後者先可以醫飽我個肚。
我諗，我同QQ都算係建立咗深厚嘅關係嚕掛，雖然佢而家係沒路用啫，但做人要睇長遠啲；縱使佢最後唔係我條女，就算以後唔再一齊住，佢應該都唔會忘記我嘅恩情掛？第時佢總會有嘢可以畀返我嘅，我相信…希望在人間吖嘛。




望下望下，QQ已經著返件褸，出咗嚟廳喺度食緊曲奇，無嘢叻嘅女人至耍家嘅就係摷嘢食。
我：「咦，妳鍾意食黑罐呀？」
Q：「OK咁啦，肚餓就乜都好食，起碼都係made in丹麥吖，點都好過嘉頓雜餅，其實我就鍾意食Mrs Fields多啲，始終新鮮焗出嚟嘅感覺係唔同，但我就唔明點解要整到鬼死咁甜，如果可以嗌少甜就好，本地嘅Quartet都唔錯，但係就乾身得滯，食完個口感會好粉…」
我真係怕咗佢，一講啲食或者品牌嘢就可以唔停…
我：「無呀，黑罐過完年特價我先買咋，如果妳啱食嘅話我聽日再去買多罐囉。」
Q：「你鍾意啦，有得食好過無得食。」
Mrs Field我知係乜，成廿蚊塊，八點後買一送一，我特價食過一次，甜到漏韌韌地咁都唔知有乜好食，係啲果仁同朱古力碎算係夠足料。
跟手我就同佢開飯。
Q：「其實今日嚟M都幾好。」佢咬住粒雲吞講。
我：「吓，妳咁辛苦重話好？」我咬住塊椰菜講。




Q：「今日嚟M喎，就即係過兩個禮拜陸運會我就好健康，唔使擔心撞期問題。」
我：「乜危險…授精期會體能好啲㗎？」
Q：「妖，你哋真係講乜都好鶻突嘅啫，咁起碼唔會M痛影響表現先。」
我：「嗰段期間個身體係咪會激動啲㗎？」
Q：「唔知呀！亦都唔會話你聽。」