為了實現媽媽遺願，我成為了女兒國唐僧: 326

「嚟啦，等我幫你重振雄風，到時就唔拍俾女仔笑…」家下搞乜呀，寶藥黨騙局咁款。
「同埋坐你隔籬嘅Queenie都報咗兩樣啦，你咪當一齊玩下囉，咁啱大家同社。」
啊，原來Queenie都有玩，無同過我講嘅？但係我又真係唔多想玩，唔知QQ想唔想我陪佢呢…
無理由喺度開口問佢㗎，點鬼知佢哄咗埋嚟咬我隻耳仔：「你每報一樣，我就惜你一啖。」
聽到佢咁講，猶如陽起石溝女貞子三碗水煲成一煲水飲，成個人爽晒。
我：「好啦，我玩啦！最多可以報幾多樣？」
睇到我好似食咗九轉還魂丹咁款，就連個社長都呆咗：「可以…兩徑一田或者兩田一徑。」
健：「嚟啦，陪我一齊跑三千米！」
我：「吓？！你無嘢呀？做乜咁睇唔開無神神跑三千米，乜你有咁熱心㗎咩？」
健：「無…我哋個社長…個師姐七情上面咁，一時心軟咪幫下佢囉。」原來佢都係騙局受害者。




「係嘅，對住Bubble姐又真係好難抗拒嘅。」
我：「吓…佢唔係著PE衫你都知佢乜社嘅？」
「無，咁啱今年得一個社嘅社長係女仔嚟啫。」
對於我呢啲不問世事嘅神隱人士嚟講，㞗知邊個打邊個咩，但叫得Bubble，都夠晒有遐想『胸』間。
我：「咁，是但啦，就幫我報三千啦。」
「好嘅，咁你另外重有無乜識玩？」
我：「全部唔識玩，又係你話落去兜個圈就得。」
兜個圈就可以同女神惜，乜本都回晒啦。
「一百米啱唔啱？」
我：「吓…好harsh喎，四百得唔得呀？」




就算唔跑開都知，一百係用條命嚟去跑嘅，如果揸留攤又會超級樣衰，拉長啲輸多啲都無咁礙眼吖嘛。
「四百好多人報喇喎，不如百一跨欄吖。」
我：「好呀。」
隔籬幾個又係呆咗，不過跳欄對我呢個街童嚟講可以話係求生技能嚟，基本上馬路圍欄，巴士站欄，地鐵欄我都可以視之如無物。
我：「再加多個木球得唔得？」
中一嗰年又係俾人謴咗去玩，木球係我唯一玩過嘅嘢，鐵餅標槍嗰啲我驚插死人。
「乙組無木球㗎喇，推鉛球得唔得？」
我：「OK。」上年教過，雖然我無乜上堂，但㞗推個波出去都無乜難度啫，就咁話，搞掂晒。
「好多謝你嘅鼎力支持！麻煩喺度簽個名啦，重有唔該晒Queenie妳。」
簽完個名社長就滿心歡喜走咗，睇嚟去搵下一個獵物。




健：「太好喇，有個熟人陪我一齊跑！」
我都懶得理佢，反正我嘅目標只不過係右女神嘅香吻，不過我覺得佢呢個舉動係好愚蠢，因為我絕對有信心跑贏佢，就同康樂棋嘅道理一樣，雖然睇佢個款都唔係諗住要爭名次㗎喇。