thriXt Qantasy 純文字安眠之作 (New: - U2K - 一直上架): 300

買完嘢食就過去隔籬公園，好彩只係一分鐘嘅路程，唔會話攤到啲嘢食凍晒，串燒梗係要熱辣辣食先好味㗎嘛，如果唔係就太大嘥。
去到公園我哋坐喺石壆，嘢食就放喺我哋中間。
呢個時候QQ應該瞓咗喇掛…我明明就同佢無挐無掕，但我竟然覺得心虛，我究竟係咪黐咗線？我好驚佢會打電話嚟，又或者send message畀我問我做乜咁耐未返到屋企…其實我係咪應該大方啲同佢講我同緊同事食宵夜，不過我點解要報告畀佢知呢，而且我都唔想畀佢知。
唔通偷情真係過癮啲？但我又唔係談緊情…
「咤！」
我：「我重喺度諗緊妳要點開個酒樽…」
A：「咪玩啦，做啤酒妹點可以隨身無開瓶器。」
講完佢就攞起咗隻大雞髀嚟食，而我就執起咗串燒墨魚丸，一分錢一分貨，一睇個樣就知串燒鋪呢啲靚過酒樓火鍋任食嗰啲。
A：「喂，留返一粒畀我呀。」
同Angel姐姐一齊食嘢呢啲就無乜好講啦，費事要你哋半夜三更一路睇文一路餓住個肚咒駡爛作者，我一路望住Angel心口都戥你哋辛苦呀。




話咁快就食到七七八八，Angel喺度飲藍妹。
點算好呢，平時同佢一齊返工可以好容易咁謦欬，執完一張枱見佢得閒就會講幾句；而家出到嚟，我哋唔再係同事，我反而唔知應該同佢講乜先好。
A：「其實而家已經係情人節喇。」Angel首先打破沉默，揸住枝藍妹若有所思咁望向前方。
我：「係呀…不過呢一日唔關我事。」
A：「都唔關我事…」然後佢又飲一大啖啤酒。
我：「妳咁靚女，應該總會有人追妳㗎？」
雖然QQ無同我講，但見佢呢幾日好似特別多message，應該係有啲勇士無神神咁想約佢情人節去玩，以我估計就全部都俾佢已讀不回；以Angel咁嘅質素話無人約佢我都唔係好信，如果我無人無物嘅話都會約細蚊出嚟hea下啦。
A：「唔要呀，全部男人都係衰人嚟㗎！」
我：「嗯…」
A：「你話我知，係咪全部男人都係衰人？！」




吓…包唔包我…但其實我都唔覺自己係好人，只係比起以前無咁衰，又或者衰唔衰，係睇妳喺幾時識到個男仔囉。
我：「唔會全部掛…衰嘅咪唔好識囉。」
A：「同你講吖，我諗我識過最好嘅男仔就係中三嗰陣嘅初戀，雖然大家乜都唔識，但佢算係對我幾好㗎喇，但我嗰陣鍾意發脾氣，成日同佢鬧架，又唔俾佢掂我，覺得佢係為咗食我隻豬先同我一齊，我成日扭計唔肯幫佢打飛機，覺得佢好變態，終於過咗半年佢頂我唔順搵咗第二條女。」
我：「聽落都唔可以話係好…」
死火…好似話緊我咁嘅，之前我都會要細蚊服侍我，尤其係佢M到嗰陣，明知佢M痛都…佢有時會黑返我面，唔幫咪唔幫囉，我又唔會迫佢，反正我可以自己打機唔理佢；不過最後係佢頂唔順搵咗第二條仔…
A：「哈哈…不過之後嗰啲就真係…無得再差。」
我：「咁就唔好講啦，以後識過啲好嘅咪得。」
A：「我喺度諗，其實隻豬最後都會糊厘糊塗無咗，點解嗰陣唔早啲畀佢算喎，喺度以為可以留返畀將來嘅老公…如果早啲畀佢，可能就會繼續惜我，唔會搵咗第二個。」
我：「我睇就未必，食完…都係咁嘅啫，相處唔嚟都係會分返開，細個點會唔鍾意玩喎，有邊個甘心成世人剩係玩得嗰一條女。」
A：「睇嚟，你都好清楚男人嘅心聲。」