為了實現媽媽遺願，我成為了女兒國唐僧: 251

係零呀，但我唔敢答你。
我：「咁急…唔係幾好喎，呢啲隨時即block㗎，你諗清楚先好博喎，衰咗唔好走嚟同我喊。」
健：「咁又係，之前都話上到傳說先表白。」
呢條友睇嚟真係無乜溝女邏輯，你唔係以為上到傳說啲女就會鍾意你呀，打機叻同溝女叻係兩回事嚟㗎，不過睇嚟呢啲直男都阻唔到佢。
我：「不如你計過度過，到佢當你係朋友先再諗呢啲啦，你連佢幾大都唔知呀。」
健：「影得幅咁嘅比堅尼背影，唔會細得去邊啦。」佢好有信心咁講，呢句真係有sense嘅。
我：「係你唔知佢心口有幾大呀！」
健：「頂你呀！侮辱我女神！但係…我點先知佢幾時開始當我係朋友呢？」
我：「到佢會主動搵你，謦下啲低B無聊嘢嗰陣時就係嘞。」
健：「睇嚟都真係機會渺茫。」




我：「其實你咁執著做乜喎，打機嘅女仔又唔係得佢一個，不如你多啲同匹到嘅女仔吹下水，去chatroom度招friend子，甚至乎去啲大團都識到女㗎，聽講佢哋會搞每月飯聚咁，雖然…女嘅話可能要爭崩頭。」
健：「我鍾意Kuromi，唔要其他。」
我：「咁Kuromi到底有乜好先？」
健：「我鍾意佢個名叫Kuromi，鍾意佢鍾意Kuromi呢隻公仔。」
死宅男…吹佢唔脹，呢個理由都幾有說服力。
我：「唔夠你講，你想點就點啦，又唔關我事。」
健：「就算唔會成功，至少，我好想知道佢真人係乜樣，唔係約會都無問題，見到都心滿意足。」
我：「就算女神咁靚又點，坐我隔籬都有個啦。」
健：「點同，嗰啲睇到個樣都覺得乞人憎。」
係咩？可能係嘅…但同一個人嚟㗎咋。




健：「你溝過咁多次女，有無死橋諗到可以無厘挐更約佢出嚟㗎。」
我：「要睇下有無hints喎，例如佢好鍾意某個偶像，你咁啱有佢哋啲周邊或者演唱會飛，又可能你咁啱…唔知點解…有隻好靚嘅Kuromi公仔。」
正路就係咁嘅，但我知道係無解。
健：「係喎，等我得閒去Sanrio睇下先。」
無眼睇，佢應該係連Sanrio同San-X都唔識分嘅傻仔嚟，睇住佢為女死為女亡實在得啖笑。