為了實現媽媽遺願，我成為了女兒國唐僧: 245

我：『咁你係咪要溫書呀，重玩唔玩？』
健：『我喺度諗緊佢屋企管得咁嚴，為咗乜會成日唔得閒，唔係要乖乖留屋企嘅咩？』
我：『你問佢啦，我鬼知咩。』
我真係鬼知，因為QQ要同我出去飲茶同玩。
健：『如果我問佢，佢會唔會覺得我八佢私人嘢無禮貌，我好驚佢怕咗我。』
佢就真係唔會怕你，而家係我怕咗你；講真要溝女就遲早都要知道佢嘅私人生活係點㗎啦，至於要點進攻就都係睇條女反應，但Kuromi係物理上無可能俾你打開缺口，識睇女仔反應嘅男仔見唔對路係會自行打退堂鼓。
我：『等機會囉，如果佢行前一步你咪氹佢講多啲，如果佢縮你咪收口。』
健：『唔知我幾時可以約佢出嚟見呢？』
我：『唔好貿貿然呀，佢feel到唔自在block埋你都有份呀。』最好快啲block等佢唔好煩我。
健：『我梗係知啦，但如果拖得耐，丟淡咗就會變成普通機友無感覺，就重難開口。』




呢個真係千古難題嚟，溝女…首重高大靚仔有家底，次要聰慧過人有才華，把口風趣幽默氹死女；但當中嘅關鍵點，就係點控制雙方嘅距離，速度，同埋感覺！只有做到呢樣嘢先可以成為情場高手。
我㞗噏㗎咋，識條毛咩，係聽過Carmen姐姐同我講；女仔感覺呢樣嘢好難用文字描述，要控制佢哋有感覺就難上加難，但我上次真係感受到細蚊嘅感覺；嗰種係真心相信，欣賞，鍾意你嘅眼神，而唔係為咗排解苦悶，避免寂寞，享受物質而同你一齊。
咁QQ都有…感動過嘅，但我同佢嘅關係，實在唔識講。
我：『唔識教你溝女呀，快啲開啦！』
健：『唓，我都係尊敬你拍過咁多次拖先問你咋。』
其他女，我唔介意幫你，Kuromi我實在無能為力。
打咗一陣，Kuromi已經完事，落床走咗去廁所清理，我無理佢自己繼續玩；點知佢出返嚟之後爬咗上嚟我張床度…
Q：「喂！坐入啲啦。」佢將我迫咗埋牆。
我：「搞乜鬼呀妳…」
阿健帶隊友去偷襲，我一個人死守三個三塔，手指飛快地舞動，根本無暇理會女神。




Q：「做乜呀！好唔想我過嚟搵你咩？！」
我：「唔係…點會…只不過我玩緊。」
Q：「又無話唔俾你玩，人哋寂寞吖嘛…」