thriXt Qantasy 純文字安眠之作 (New: - U2K - 一直上架): 231

即係咁，雖然我聽唔明乜係great canyon，但都知佢想影到個日落景色係有幾壯麗同淒美，問題係嚿石都只係一嚿普通size嘅石，所以…我唯有坐低個人，拉高個畫面，盡可能將啲多餘嘅嘢剔出畫面之外，等個張力點去返落女神個神情度。
而QQ佢亦都好醒目，時而眺望遠空，時而低頭沉思，時而側頭睥睨鏡頭，個樣戳到佢吖，十足十成個死女神咁…呀，唔係，佢真係右女神嚟；我勁想企起身車佢一巴叫佢唔好咁扮嘢，如果我好想將自己跳入個墳墓嘅話。再加埋呢個入射105度嘅橙色側光，同天空上嘅橙藍漸層染做背景，都算係交到功課喇，QQ望咗幾張都話OK，好彩今日天氣好，咁佢頭先曬咗一陣嘅付出都無白費到。
無錯，佢係有鬧我做乜唔帶遮；鬼知咩，失驚無神要搭船過嚟，不過都係我衰，以後日頭同佢出街都係要帶定把縮骨遮至得。
我：「不如屈埋隻腳放上嚟吖？」
Q：「嗯，係咪咁樣？」
我：「係呀…再雙手抱膝，拉高少少條裙，下巴貼住自己膝頭吖…日落西沉可以sad少少。」
Q：「諗起下次唔知幾時先再有蝦餃食就好sad。」
衰妹QQ吖，重要畀壓力我添。
而我就一路影，一路轉個人去到差唔多正光嘅位置，背後係紫藍色嘅天空，QQ嘅髮絲喺夕陽嘅照耀下反射出絲絲金光，再加埋佢個到晒位嘅死人表情，最重要嘅係…有美腿啊，隻腳返返嚟喇。
Q：「唔好以為我唔知你想點呀。」




我：「邊有想點，一切都係從藝術角度出發…」
係嘅，呢個角度如果我唔專登避開係會走光嘅，而我肉眼就梗係乜都睇晒啦，對比起屋企周不時望住佢剩係著住條底褲走來走去，咁樣欣賞佢嘅裙下春色又會有另一種唔同嘅感動。唔著褲畀你睇還畀你睇，我總無可能專登䚎佢裙底或者揭起佢條裙㗎嘛，係咪？
Q：「影成點呀，OK嘛？」
我：「嗯…QQ妳好靚。」我揀咗一張遞畀佢睇。
Q：「唔該晒交叉仔，見你䚎得鬼死咁辛苦，益下你喇。」佢喺我面前擘開隻腳，將條裙反摺上大髀，金色嘅斜陽無遮無擋直射入佢嘅胯下。
我：「妳…妳做乜嘢喎…」
Q：「見你想睇咪畀你睇下，又唔係未見過。」
平時點同喎…妳係郁來郁去，又唔會咁近，角度都無咁誇張啦，於是我唔好意思就擰乜塊面。
我：「都話我係為咗藝術角度…」
Q：「定係你已經望到厭咗？」




我：「有乜可能…正常男人都…妳條仔厭未吖？」
Q：「佢？你認為我會唔會喺佢面前做啲咁鶻突嘅動作吖？」
我：「吓…妳唔係想同我講佢有得食無得睇呀？」
Q：「咁又唔會無得睇嘅，但我會斯文啲囉，佢過份嘅話我會㧬開佢㗎，同咪要較暗啲燈。」
我：「乜妳係咁含羞答答嘅女仔嚟嘅咩？」
Q：「唔係嘅，不過慣咗係咁。」
我：「今時今日啲女神真係好鬼假。」
Q：「啲男仔受呀，我都係想生活好過啲啫。」
我：「睇得一時唔睇得一世…等我…」我舉起電話…
Q：「低B仔，部電話係我嘅，你影幾多張都唔會到手㗎啦，不如慳返啖…」




「咔嚓。」唔係快門聲，係iPhone聲效而已。