為了實現媽媽遺願，我成為了女兒國唐僧: 229

落到去沙灘，呢個灘都幾細下，好在冬天唔算多人，得小貓五六隻；正面望出去個海就係一座發電廠，即係南丫島最出名嘅三枝煙囪，我諗…呢個景有好有唔好啦，起碼都係叫做一種特色嚟。
然後去到沙灘邊嗰幾級樓梯，QQ就喺度除鞋。
我：「唔使除鞋啦，咁凍都落唔到水㗎啦。」
就算唔怕凍都會整濕條長裙啦，我長褲更麻煩。
Q：「我唔係要落水呀，係啲沙會刮花我對鞋。」
唔講都唔記得，佢對鞋好鬼死值錢，以前就話無乜所謂，而家整花咗佢喊死都似。放好對鞋之後我就拖住赤腳嘅QQ行落沙灘。
Q：「喂，幫我孭住個袋先，好好惜住佢，知唔知？」佢將佢個LOEWE包包圈落我條頸度。
我：「妳講到個袋重緊要過妳忽肉咁。」
Q：「真係呀，你整花我都無乜嘢，整花我個袋嘅話呢，有排你受呀！」
我：「我好想刻QQ兩粒字上去㗎。」




Q：「咁我順便用雕刻刀喺你包皮刻QQ兩粒字。」
我：「妳對住男朋友都係咁㗎？」
Q：「點會，不知幾鬼斯文純情同乖。」
我：「辛苦晒妳，但咪又係被迫要做嗰啲嘢…」
Q：「唔准再講呀，幫我影相啦。」
美女加沙灘加海，啲相就來來去去都係咁㗎啦，主要問題都係因為而家係冬天，佢上下身都遮住晒，發揮空間大打折扣；就算烏低身，就算跳高，就算踢起啲水，始終都係少咗酥嫩軟肉嘅加持。
不過嚟到呢度，佢都係要試圖喺相入面推冧嗰幾條煙囪，人哋就幫手托住比薩斜塔，妳就…真係有破壞無建設，港島大停電到時為妳是問！
冬天五點幾就開始夕陽西下，我哋更要好好把握呢少少時間影多幾幅相。
Q：「我想去嗰邊嗰嚿石頭上面影相呀。」
我：「都可以嘅，但有乜特別？」




Q：「無乜特別，靠你幫我影到有great canyon或者red valley嘅感覺出嚟就得。」
雖然我聽唔明，都知佢講嘅九成係世界知名自然景點嚟，我唯有搖頭輕嘆，而我諗前面呢嚿得一米多啲高嘅石頭仔都喺度滴晒汗。
係咁㗎喇，呢啲係港女女神嘅威力，就算係落完雨馬路上嘅一灘水氹都可以係天空之鏡，映照住呢個石屎森林嘅摩天大樓。
我：「好多碎石喎，妳唔著返對鞋？」
Q：「梗係唔得啦，容乜易刮爛個鞋底。」
我：「妳隻腳板底就唔易刮爛咩？」
Q：「軟㗎嘛，應該OK嘅，細細力咁行囉。」
我：「傻瓜，上嚟啦。」
我札好個馬坐低個人，QQ都清楚我想點，一嘢捉實我膊頭，擘大大髀鉗實我條腰爬咗上我背脊，而我就用雙手圈住佢對白滑大髀，再磴一磴個人企返好，幫QQ個屁股上埋一個適合嘅位置。