為了實現媽媽遺願，我成為了女兒國唐僧: 228

原來女神製作中嘅畫面係咁低B嘅，平時喺IG見到嘅係去蕪存菁嘅精華畫面，幅幅都賞心悅目睇到男生血脈沸騰；但原來…背後錄嗰陣你只係覺得有個低B妹喺度郁來郁去；唔可以唔講，佢啲手腳係幾軟下，唔使幫手隻腳都可以抬到去心口嘅水平…而且，佢好似唔記得咗一樣嘢，小姐你著緊長裙㗎，隻大髀俾人睇晒喇，就嚟小底褲都出埋嚟。
我：「哈哈哈哈哈！」
Q：「笑乜嘢呀笑！」佢一嘢拍落我頭頂度。
不過呢，就連佢自己都喺度笑緊。
我：「好想將妳所有片直接掉晒上去，等啲男仔女神夢幻滅，嚇到unfol…哎唷吖！」
我未講完佢就一嘢揼落我大髀，自從我幫佢解決咗無家可歸呢個問題之後我都未試過再俾佢揼…
Q：「再亂講嘢吖嗱？咁你係咪要unfollow我？」
我：「吓？妳從來都未俾過我follow喎。」
Q：「我話現實呀。」
我：「現實…喺我眼中妳都唔係嗰種女神嚟，我唔會因為妳kai而唔follow妳喎，QQ咁可愛。」




唔係嗰種大眾女神，而係我心目中唯一右女神。
Q：「畀啲成品嚟睇下。」
然後QQ就轆返自己啲相同片嚟睇，佢自己睇到自己咁低B都喺度笑，睇嚟佢唔係雞泡魚，會俾自己啲毒毒到。
Q：「咪笑呀！認真，加啲colour filter，加啲effect，再剪走啲樣衰嘢，咁就可以放…哈哈！」
真係估唔到，同佢一齊亂咁搭船嚟窮遊都可以玩得咁開心，其實女神都無我以前認知中咁物質。
Q：「想問附近有無地方睇到日落㗎？」
我：「呢度每一個位都睇到日落㗎啦。」
Q：「我係話有無位係影，相，靚？」
我：「呢度行返落山有個沙灘嘅，但我唔知靚唔靚㗎喎。」下面嗰個係叫洪聖爺灣。
Q：「咁我哋快啲落去啦，點都好過喺山頭影。」




於是我哋又起行行返落去，真係好鬼死忙，喺香港離島都要咁，如果去外國旅行咪重慘過返工？
查實做女神都唔係咁過癮…
不過呢，可以全日都拖住佢手仔周圍去，簡直就係興奮到一個點，就嚟連自己都呃埋以為QQ已經係我女朋友，想隨手一抱車個嘴埋去，再順手拉起佢條裙攝隻手入去摙下佢屁股。
咁當然唔得啦，一失足成千古恨㗎，當個女仔有一刻對你唔再信任，你做幾多嘢都彌補唔到。