為了實現媽媽遺願，我成為了女兒國唐僧: 226

https://www.shikoto.com/articles/244657.html
QQ的放蕩文學分析教室已上線，鍾意惡攪文學就去支持下啦。

我諗佢好鍾意媽咪掛，就算係我而家都會期待每年拆佢封信，好唔捨得，又會覺得佢喺身邊，如果有新媽咪呢種感覺好奇怪；況且我都大個仔唔使再搵人湊，搵個媽咪返嚟其實都無乜蛋用，分分鐘再多個新兄弟姐妹都唔知點算好，同細佬打㗎？䚎呀妹換衫？又或者新媽咪可能只係一個大我幾年嘅姐姐…唔得，唔可以再諗，太奇怪，而且過咗咁多年都無發生。
希望老竇喺出面搵到食啦，可以同啲青春貌美嘅姐姐仔happy下，我諗媽咪喺個天上面望住佢都會笑，就好似QQ望住我同細蚊奸笑咁。
我唔再需要多一個屋企人，而家已經有咗一個完美嘅喺我身邊。
Q：「喂！停呀！」佢扯住咗我。
我：「嗯，做乜呀？」
Q：「叫極你都唔停…我要食豆腐花。」
佢指住一間山邊豆花檔，『阿婆豆腐花』。




每次見到佢扭嘢食，都覺得佢成個細路女咁，實在係好可愛；鬼叫佢無錢咩，食嘅每一蚊都係我出㗎，同我講嗰陣就梗係要七情上面啦；不過豆腐花就easy job啦，對比起今朝去飲茶…不過原來都唔係太平，一碗豆花盛惠十四蚊，而我平時喺便利店食百福係五個大洋。
講起百福，我好細過媽咪重在生時佢同我食過百福燉奶同燉蛋，都係好好味，不過好快就同我媽咪一齊消失咗喺呢個地球。唉，四方果呢啲垃圾啫喱消失都話活該啫，而家要搵碗正常價錢食嘅燉奶真係難過登天。
就係咁，我哋搵咗個位坐，叫咗兩碗熱豆花，同埋十八蚊十粒嘅咖喱魚蛋。
我：「妳喺度搞乜呀？」
Q：「加黃糖囉。」
我：「我夠知咯，但做乜好似喺度繡花咁。」
佢囉住枝黃糖，放喺碗豆花嘅正上方，慢慢唧啲糖粉出嚟確保佢哋降落喺個碗嘅正中心。
Q：「攞嚟影相咪要整靚啲囉。」
我：「真係唔明妳幾時要影相呢個準則。」
Q：「無準則㗎，想影就影，影完先再諗用唔用。」




最後佢喺個豆花面上起咗一個富士山咁嘅物體，又話驚肥，又落咁多糖，妳真係吖；然之後重要換位，確保唔會背光，影到個招牌之餘重要影到後面個食物檔；我喺度諗，呢啲IG角度就係所謂嘅experience，重點唔係食，而係人哋知道佢喺度食，間鋪其實應該請我哋食啦，咁樣影一影就有上千個人會睇到你呢間鋪，做廣告費好合理。
咁我明佢點解話唔想喺文華廳影，因為影得嚟啲點心都凍咗，搞一大輪食落口都唔知乜味。