為了實現媽媽遺願，我成為了女兒國唐僧: 225

QQ就企喺條頗窄嘅街道中間，左邊有幾個鬼佬企喺間酒吧門口吹水食煙飲啤酒，右手邊就有個阿婆喺架放貨手推車上面排緊蠔油蝦醬，再後面有堆無聊嘅香港人喺度排緊雞蛋仔…奇形怪狀嘅街道再加埋美女，出嚟嘅感覺竟然出乎意料咁好，QQ睇完都話好值得放上IG，同平時啲相感覺好唔同，尤其係幾個鬼佬就望實住佢，阿婆就望住我影相。
咁，我都有諗過買雞蛋仔㗎，唔係因為有乜特色，而係我實在係未夠飽；但我就唔係幾好意思咁啦，啱啱食完啲咁好味嘅嘢，我應該好好珍惜嗰種味道，唔想咁快放其他嘢落肚住，而且我又唔想女神覺得我係視飽肚大於一切。雞蛋仔呢一樣嘢真係入咗香港人血，好似前面加個地名就會變名店，例如北角雞蛋仔，紅磡雞蛋仔…我就幾乎肯定南丫島同雞蛋仔呢樣嘢係無乜關係嘅，唔通喺度會有個雞場生蛋再用嚟即製雞蛋仔咩；諗諗下，不如叫馬叔叔喺酒樓加多味雞蛋仔點心，由我學完操刀製作，效果可能都唔錯…
呢條大街唔係好長，十分鐘到就已經行完。
Q：「呢度附近重有乜嘢睇㗎？」
好彩頭先有轆手機，嚟呢啲地方真係唔可以靠女神，如果我有錢行IFC就唔同講法。
我：「如果妳肯行下樓梯，山上面有風車。」
望過地圖要行成半粒鐘，我唔敢貿貿然決定。
Q：「風車？好呀，就去啦！」
我：「妳唔好行行下話行唔郁呀下。」
Q：「點會喎，我做gym跑一粒鐘都係咁。」




我：「但平時真係唔覺妳咁好動吖嘛。」
Q：「有得打卡就唔同㗎啦！快啲帶我行呀。」
港女…係一種好特別嘅生物，叫佢放啲衫入洗衣機㩒幾粒制都懶到唔願郁；但為咗貼IG，佢哋可以爬上山頂捱眼瞓睇日出，可以夜鼆鼆去沙灘冒住俾蚊咬死嘅風險觀星，明明唔識游水就走去玩wakeboard，同佢講只要有人肯睇，坐喺懸崖邊影相都在所不惜…
而且，就算平時再密實喺IG都要露下肉，好似已經成為咗一個文化嚟。
我好細個就識睇地圖㗎喇，老竇周圍去，返嚟就會打開幅地圖同我講故事，講下當地嘅人係點，食咗啲乜中伏嘢；大過咗我會諗，佢無講嘅係咪食咗啲乜嘢女呢，佢都係男人，而且都重好後生，明嘅…我諗媽咪都唔會怪佢嘅，無理由會想自己個老公幾十年無愛做㗎…細個嗰陣都有期待過老竇會幫我搵個新媽咪，幻想可能會喺外國娶個老婆返嚟，結果又真係無。

預告：稍後時間會有（偽）外傳——QQ的深層次文學剖析上市，敬請期待。