為了實現媽媽遺願，我成為了女兒國唐僧: 213

真係一個好不遴迍，為咗唔浪費廿幾蚊一粒蝦餃入面嘅肉汁，我用筷子夾住嘅另一半蝦餃嘅皮封住個嘴角，抹返啲肉汁上嚟啜入口中，而QQ見到我個狼狽樣就喺度望住我笑。
Q：「點呀，滿唔滿意呀？」
我：「好滿意！我知妳點解要嚟食喇。」
重未形容完，粒餃入面啲蝦肉，完完全全係爽口彈牙，滲透住陣陣海鮮味，只有生鮮活蝦先可以有呢種滑嫩嘅質感；而塊皮呢，就更加係技高一籌，同剩係識食牙尖嘴利嘅QQ唔同，我對呢塊澄麪皮都略知一二，要知道普通酒樓為咗慳時間，通常都係十籠八籠疊住一齊蒸，咁自自然然放最底嘅就最熱最濕，而最頂嘅就係僅僅熟…對塊皮嚟講呢，最頂嘅就會韌得滯同埋咬落去粉，而最底嘅就會又濕又淋，軟到差唔多一夾就溶，而且放最底嘅就實係蒸最耐，連入面啲饀都會老晒，啲蝦肉就會死實實；而且上枱嘅時間都有技巧，蒸完攤返一陣先上，咁塊皮就會最有彈性，咬落去又唔會辣親個口。
點都好，我口入面呢粒蝦餃，係我食過最完美無瑕嘅一粒，就算人生中你要食幾多千包公仔蝦餃都好，至少都要食一粒呢度嘅。
好好味，實在係太好味，我好想可以有機會再食，講真廿幾蚊一粒蝦餃唔係乜大數目，但人哋係一個package嚟，唔會得閒serve你俾你每日上嚟食一粒蝦餃。
我望住對面嘅QQ，佢係一個好優雅嘅女仔，出身比我好太多太多，靚女身材又好更加知書識禮，可以話係我認識之中最完美嘅女仔；我好想可以同佢有機會發展，識咗佢之後，其他女仔已經滿足唔到我…我個心無時無刻都喺度諗住佢，為咗妳，就算有其他女仔送上門我都可以放棄；但，我知道，同蝦餃一樣，我唔可以只係叫佢俾我愛一次。
Q：「做乜係咁望住我啫…」
我：「多謝…妳帶我嚟食蝦餃，實在好好味。」
Q：「唔使客氣喎，你重要努力搵錢養我㗎。」




“Queenie，我會養妳一世㗎！”
我講唔出口…喺個腦度諗出嚟都已經尷尬，搵得嗰少少錢都係夠佢食飯㗎咋，我自己都重要靠老竇養，又點敢咁大想頭吖。
然後待應又上咗兩籠點心，今次係燒賣同蟹肉菠菜餃，好好味呀，不過唔再同你哋講有幾好味，費事你哋有得睇無得食走嚟話個爛作者呃字數追斬我。
請你哋記住，冤有頭債有主，佢負責寫字，我負責食點心同埋對住QQ，如果你哋有乜不滿請搵啱人。