thriXt Qantasy 純文字安眠之作 (New: - U2K - 一直上架): 212

等咗兩分鐘，待應姐姐就上咗兩壼茶畀我哋。
我：「其實點解要嗌兩種唔同嘅茶嘅？」
Q：「茶係計人頭，一樣錢就梗係嗌兩種唔同味㗎啦，咁樣心理上都覺得抵啲。」
我：「其實我飲水都可以㗎喇。」
雖然去飲茶唔嗌茶好樣衰，但小朋友如我又有幾多個會鍾意飲茶吖，五蚊到十蚊嘅一個茶位對我哋嚟講可以話好無謂；例如我返工間酒樓就為咗吸學生生意，晏晝唔使加一之餘，重可以俾佢哋唔要茶改做罐裝汽水，簡直係一家便宜兩家著；雖然我唔使洗茶壼，都要倒走茶葉同開水浸，又重，又阻埞，又麻煩…汽水罐就掉晒去後門等紙皮阿婆處理就得。
Q：「傻瓜，呢度嗌枝San Pellegrino礦泉水貴過你飲茶呀，你就乖乖哋啦。」
我：「好啦…妳話事就得，聽晒妳話。」
QQ就分咗壼茉莉畀我先，同普通酒樓唔同，呢度啲茶具係唔使洗嘅，因為佢哋乾淨到你會覺得洗咗自己啲手油上去整污糟佢；我同QQ一齊倒茶落茶杯度，再放入口慢慢呷一口，咦，又真係幾好味喎，有種順喉嘅甘甜，又聞到淡淡嘅清香，同我飲開酒樓嘅茶係唔同層次。
呢度所有食客都好斯文，只會細細聲交談，成個環境好寧靜閑適；平時飲茶啲大叔自吹自擂嘅噪音，小朋友跑嚟跑去嘅尖叫聲，阿媽鬧仔嘅咆哮，點心阿姐sell叉燒酥嘅嗓音，都唔會喺度出現；只有一個優美恬靜嘅女神喺我對面歎茶，返到去原本屬於佢嘅世界，享受片刻嘅生活。
呢個環境嘅佢好迷人，重靚過佢平時剩係著住內衣褲通屋走。




然後等咗陣，一籠蝦餃送到嚟我哋面前，當蓋子打開嘅時候飄出裊裊輕煙，彷彿已經聞到陣陣嘅蝦餃香；咁大個仔第一次咁認真看待一籠蝦餃，話晒都成嚿水唔止，十幾萬字之前講過嘅十包公仔蝦餃換一籠，我而家竟然有得食。
而QQ個樣就好幸福，好滿足，好甜…
Q：「趁熱一齊食啦，唔好顧住望靚女。」
QQ口中嘅靚女當然係指佢自己，我諗呢刻嘅佢都知自己好迷人，白裡透紅肌膚勝雪嘅佢同幾粒蝦餃比起上嚟實在不遑多讓。睇住佢用筷子優雅咁夾起一粒蝦餃再放喺隻瓷羹上面，慢慢啖入口中…
於是我又夾一粒嚟食，一放入口中咬開，實在係驚為天人！首先係皮薄，然後係貼肉嘅，即係入面啲饀料係飽滿脹起撐住塊軟嫩嘅澄麪皮，喺我重讚嘆緊嘅時候，啲蝦饀嘅鮮香肉汁已經喺我嘴角度流緊出嚟…