為了實現媽媽遺願，我成為了女兒國唐僧: 196

健：「做乜前幾日打唔夠幾場就自己走咗去呀？」
我：「無呀…隻眼有啲攰，見贏咗咪抖下。」
健：「你講大話！」
我：「我無講大話。」屌，家下特首選舉辯論咩…
健：「哼哼，肯定係因為我搶走咗你個Kuromi所以唔開心發爛渣走人。」
救命呀，勁老尷囉，Kuromi就坐喺隔籬咋，你想點搶走佢呀，大佬…
我：「第一，Kuromi唔係我嘅；第二，佢只係一個間唔中會同我打下機嘅女網友；第三，我衷心祝你好運唔好俾『港女』玩。」
當我講到『港女』兩隻字嗰陣，QQ用佢眼尾睄一睄我，一齊生活咗咁耐，我同佢已經非常熟悉對方嘅小動作同脾性。
健：「哈，重以為你溝女咁勁，而家單身實會同我爭添，估唔到今次咁禮讓喎，多謝晒，惜啖先！」
我：「屌，咪黐埋嚟呀！你係咪返學前未食藥呀？」我一手推開個變態佬。




妖，真係勁尷尬囉，我個位左邊，後邊，前右，重有右手邊都係女仔…無端端走嚟話我溝女勁，係咪專登嚟幫我立flag㗎，我只係想平平淡淡同女神一齊上堂咋。不過今日嘅阿健實在係非常之有夠唔妥，好似食完忽得，LSD，K仔，或者冰咁，小朋友千祈唔好學亦都唔好掂呢啲嘢…不過佢咁嘅死款睇怕又係想走過嚟同我曬命。
係嘅，唔同我曬同邊個曬吖，佢隔籬位個阿康被嚴禁打機，所以幾時都話先用功讀書，後放肆娛樂先係明智之舉。
健：「係咪你俾細蚊帽完之後太過傷心，驚晒所有女人喇。」
真係嚟撩架打㗎喎，雖然我同出面嘅女仔拍過拖唔係乜秘密，亦唔介意人哋知道我分咗手，班入面嘅女仔我又無興趣…除咗QQ，都唔使走過嚟大大聲聲講啲咁嘅嘢潤我呀？
我：「無呀…帽乜鬼啫，唔鍾意就換畫㗎啦，拍下拖又唔係過人世。」我堅持自己唔係被帽，因為細蚊又唔係背住我去偷食，只係突然消失。
健：「是但啦，見係你就益下你，登登登凳！」