為了實現媽媽遺願，我成為了女兒國唐僧: 195

Q：「多謝你，全靠你我先有屋住，有床瞓，有飯食，無咗你我都唔知點算好。」
我：「哈哈…你咁講過份咗喇，間屋又唔係我嘅，多謝個垃圾政府同我老竇啦。」
Q：「你已經好叻，估唔到你個傻瓜真係會走去返工養我，少女子實在無以為報。」
點會呢，以身相許都好足夠，不過我又點講得出口喎；QQ攬到我實一實，唔知佢會唔會因為我肯養佢而鍾意我呢…但可惜吖，無論我點努力，都係無可能令佢過返以前富裕嘅生活。
然後又到咗返學…係呀，係咪好悶呢？你哋啲小朋友一放學又嚟睇個爛作者寫我點返學，睇怕你哋真係太過鍾意讀書喇，祝你哋學業進步，下次調位可以同右女神一齊坐；信我，如果女神坐你左手邊你就唔使諗，係唔會有希望嘅，佢唔討厭你都可以話係執返身彩。
唔知有無女仔會睇我呢個爛故呢？女仔係調返轉要搵個左男神坐自己左邊嘅，全寫就係…我同左男神上咗…咳咳，下刪一字；不過有無左男神唔係重點，祝妳同QQ一樣可以成為右女神。
作為一個被爛作者咀咒嘅男主角，女神有得睇無得食，EX又唔好意思推上床，捉襟見肘搞到要打工之餘重要返學真係好無人道；人哋戴志偉（戴翅偉，太空翼）每日都剩係識衝力射球同射落…早苗，柯南學都未放就踩住滑板飛咗出去，御坂美琴身為風紀重可以集集玩銀仔炮不務正業；而我…竟然要同櫻桃小丸子、野原新之助、暗殺教室班不幸同學一齊返學…如果你覺得我哋都係同是天涯淪落人嘅話，無錯，我哋嘅悲慘遭遇實屬雷同。
不過重有兩日就放年假，成績表又派完，家長又見完，今日嘅課室查實所有人都無乜讀書嘅動力。
到咗小息阿健又陰陰嘴笑走咗埋嚟，一睇就知唔方好嘢，我心諗已經無眼睇。