為了實現媽媽遺願，我成為了女兒國唐僧: 162

我：「咁又未至於…唔多囉，疏落短短地…但…已經越嚟越多㗎喇。」我要堅持為我挽回半點面子。
Q：「唉，毛都未出齊就學人衰十一，世風日下！」
QQ一路擰擰頭，一路用手指指住我痛斥我不是。
我決定深深咁還擊，現在的我已不是以前的我。
我：「唉，毛都出齊重搞到人哋衰十一，成何體統？」
我順便捉住佢指我嗰隻手指拉高佢隻手，指住佢胳肋底講；唔知係咪佢陪我溫中文日子有功，我覺得今次係反擊得好工整嘅，嘻嘻。
Q：「屌你呀！」女神爆粗係靚女又好聽。
我：「唔好太大力…」
Q：「唔玩喇，認真，有無呀…」
認真唔可以再玩，再玩落去我就會好想攬住佢，然後呢個那個…好想好想…好想…唔諗得。




跟住我就入咗廁所左摷右摷。
我：「Queenie，得呢隻咋喎，無電嗰隻，啱唔啱？」我手執一把剃刀同一枝cream。
Q：「啱喇，呢隻先啱，用電嗰隻反而唔啱。」
我：「點解用電嗰隻唔啱？」無知嘅我順便問下。
Q：「呢個係取決於你個部位係convex定concave嘅問題。」佢又真係認真答我。
我：「點解妳講嘢鬼死咁深嘅？」
Q：「係你無專心上堂咋！明明數學同geog有教㗎，聽唔明就自己溫書。」
我：「嗯…睇落都幾新淨，洗下應該用得。」
講真要佢用我老竇把剃刀都有啲唔好意思，不過慳得就慳啦，我都唔係好知呢嚿嘢要幾錢，第時睇下超市有無特價先再買把畀QQ啦。
就係咁我將手上嘅用具交到QQ手上，而佢就入咗廁所進行佢要做嘅事情。




我就繼續坐返低對住啲功課，既然QQ行開咗我就計住數先啦，係得數學我可以自己做唔使靠佢都可以做啱大部份。
Q：「喂！點解你廁所塊鏡咁高㗎？我睇唔鬼到！」