為了實現媽媽遺願，我成為了女兒國唐僧: 159

真係無啲女人咁好氣，我都係避一避走去搵下啲兄弟先，行到去見到健康兩個又喺櫃桶入面拎咗部電話出嚟睇傳說英雄教學，服咗佢哋，如果讀書有咁神心應該好快名列前茅；其實我都好想咁㗎，只不過…QQ嚟咗之後我要照顧佢，買餸煮飯嘅時間用多咗，又要幫佢洗底衫褲校服，而我同佢住自己都唔敢太污糟所以換衫頻密咗，本來成個禮拜先洗一次衫，而家差唔多要兩日洗一次；而且，以後我星期五六日晚都要返工…
不過，同QQ一齊住係好開心嘅。
我：「你使唔使呀，寫埋連招表添？」
健：「我用開隻打野改咗技吖嘛，冷卻縮短咗。」
我：「使唔使咁認真呀…」
健：「你知點解㗎，問嚟做乜。」
我：「人哋同你玩下㗎咋，你知實有機會㗎嗱？」
健：「唓，唔試下點知，難得可以順便識到女。」
順便，呢兩隻字對溝女嚟講係一個好重要嘅概念，有人入校隊順便識到女，有人去補習順便識到女；去球場躝下可以順便識到Carmen，因為Carmen又可以順便識到Mandy，無端端調位又順便同Queenie同居。
專登溝女好辛苦，順順便便，順其自然，一樂也。




健：「我幫Kuromi上咗鑽石喇，越嚟越難打，唔做多啲功課唔得，輸都唔可以輸得太樣衰。」
我：「咁你而家乜嘢段呀？」
健：「星耀二喇。」
嘩屌…又真係升得幾快喎，明明上個月先同我一齊喺鑽一爬極都爬唔到上星耀，而家竟然無端端多咗成廿粒星？！
唔得，我要追下，但我真係無咁得閒…
我：「恭喜晒…」
健：「我諗住…如果我上到傳說，帶埋Kuromi上星耀我就同佢表白。」
救命…又會認真到咁，我日日喺佢隔籬就算試過瞓埋一齊都唔敢同佢表白；或者，無知都係一種幸福，健兄你好好加油吧，希望你呢世都唔會知道真相，因為事實往往係令人痛苦嘅，我都唔想睇到你喊到死去活來。
細蚊派帽畀我嗰下有無喊呢？有嘅，半個鐘到啦，或者我其實唔係太愛佢，只係想身邊有個用得嘅女仔。