為了實現媽媽遺願，我成為了女兒國唐僧: 158

到咗第二日返學，當然全世界都留意到Queenie飛咗髮啦，女神轉咗髮型喎，重要係長變短，直頭變成今日嘅新聞話題…而我個頭呢，唔理喇，自暴自棄，反正唔會有人相信女神會同我一齊飛髮。
到咗小息，Yvonne又嚟我哋課室串門子。
Y：「嘩！Queenie妳變咗短髮嘅，好cute呀！」
我成日都覺得啲八婆們溝通係要打定稿先，講嘢都唔似係真心話嘅，好似表面係一句，心底入面又係另一句咁；而Queenie都同我講過同佢哋相處係有啲攰，不過無辦法，妳喺邊個圈子生存就要習慣嗰度嘅文化…唉，唔關我事，好彩Queenie對我唔係咁，雖然都有啲古靈精怪。
而喺呢個時候，我都會好識趣咁讓座。
Y：「嘩！做乜你又飛髮呀？」
佢擰過嚟同我講，其實我同佢無乜兩句嘅，來來去去都係畀妳坐吖，畀返個位你，或者問我Queenie去咗邊呢啲；如果你問我佢靚唔靚呢，咁都靚嘅，不過我就點都鍾意QQ嘅清純可愛多啲，嗱，我講個樣咋…Yvonne個樣係比較typical高端同成熟少少，一頭過肩嘅長頭髮平時會披喺心口前面，髮尾係燙過都幾攣下而且隱約咁打咗啲漸變highlight，喺陽光下就特別顯眼，五官就…typical啦！有需要先再諗下點形容，總之係一般男仔聽到佢把聲會覺得有啲煩嗰啲。
我：「俾訓導捉吖嘛，妳估我想㗎…妳又會知道我飛咗髮嘅…」
Y：「好難唔知囉，你由山賊變咗做和尚咁。」
我：「係呀，轉咗行吖嘛。」我附和佢算。




Q：「係囉，真係影衰我，人飛佢又飛。」
Y：「直頭侵犯版權呀，問佢攞返版權費。」
Q：「我驚收完佢會無錢食lunch喎，呵呵。」
女神…妳好嘢呀下，唔好唔記得妳啲飯錢係邊個畀妳好喎；不過算啦，喺Yvonne面前佢要繼續飾演返一個千金小姐呢點我都明白嘅。
Y：「做乜突然咁灑脫剪到咁短呀？」
Q：「溫溫下書覺得啲頭髮好煩影響我學習進度咪剪短佢囉。」女人亂咁吹係唔使打稿…
Y：「定係怕某人喺床上面壓到妳啲長頭髮咋？」
Q：「喂！」啲女人真係恐怖…