為了實現媽媽遺願，我成為了女兒國唐僧: 119

鄧：「嘩！阿爽你搞乜鬼呀？」
我：「我受咗傷，慘慘豬…」
我打開咗件褸露出咗我啲肉…係我隻包到實一實嘅手臂畀佢睇，另加一面楚楚可憐咁嘅樣。Miss Tang係一個好後生嘅先生，一畢業就嚟咗我間學校度教書，今年先係第二年，我可以話係睇住佢喺呢間學校慢慢成長…不過呢，我就覺得佢都係唔係幾掂，好似唔多識控制啲學生咁，放咗學成日見佢會俾科主任或者副校捉去謦欬。
佢生得細細粒，可能因為唔想令人覺得佢太柔弱就留咗一頭短髮，斯斯文文都幾靚女嘅，所以我哋啲男同學曳還曳都至少唔會整鬼佢，實在唔忍心吖嘛；聽聞佢上年初嚟報到教班中一俾兩個黐線嘅小朋友激到淚曬當場，咁我哋中三會好少少嘅，起碼我有乜事都想自己搞掂唔想煩到佢。
鄧：「係乜嘢事呀？唔係同人打架吖嘛？」
我：「打波整花咗啫，無乜事。」
件事已經告一段落，我當然輕輕騙過就算。
鄧：「郁唔郁到呀？有無話畀爹地知？」
我：「有事我就唔返學啦，少少事無謂煩到老竇。」我即場轉咗兩圈手臂話佢知我死唔去…
鄧：「得你一個住好心你就小心啲啦，唔好要我擔心呀，好唔好。」其實Miss對我哋又幾好人嘅，所以我哋有時會利用咗佢呢份善意，另外我都知佢好驚我有啲乜事會令佢惹上麻煩。




我：「嗯，放心，我會乖乖地。」
鄧：「但你件衫…」
我：「件恤衫太窄著唔落，箍住好辛苦…」
鄧：「但你下面著住西褲皮鞋…」
我：「咁我下面無穿無爛好健康吖嘛。」
鄧：「但你而家個樣好鬼奇怪。」
我：「如果拉埋拉鏈會唔會好啲，啲高form成日都係咁著。」
鄧：「都…係唔好嘞，你而家同我衝返屋企換晒成套PE衫再落返嚟。」
我：「吓…但係上堂鐘啱啱打咗喇喎，得唔得㗎？」
鄧：「我係先生話得就得啦，費事你俾人笑。」




我：「哦，俾人笑呢啲好閒，我無所謂。」
鄧：「我唔想其他先生走埋嚟話我班個學生奇形怪狀呀，你返去換啦，我打電話同出面校工講。」
我：「好！咁十分鐘後見啦！」
鄧：「喂…想問下你同Queenie相處OK嘛？」
吓！乜事！唔通我哋嘅好事穿咗煲俾Miss知道咗？做乜會無端端咁樣問我㗎？今次死喇…
Miss我好乖㗎…無攞QQ除出嚟啲底褲做好事…