為了實現媽媽遺願，我成為了女兒國唐僧: 118

到咗第二日嘅朝頭早。
Q：「喂，你好返晒未呀？使唔使請假呀？」
我：「我又無再發燒，呢啲請唔請假都無乜幫助，返去坐下囉，睇下有無卷派都好。」
Q：「邊有咁快派卷吖，係嘞，得你自己一個住，其實你要點樣請假㗎，可能我遲啲都要參考下。」
我：「吓，先生知我屋企情況，我話唔舒服就得㗎喇喎，佢鍾意咪搵我阿婆或者老竇囉，係唔知佢喺邊個時區可能嘈住佢瞓啫，同埋都無乜意思，我住到咁近佢想上嚟視察我有無病都得㗎。」
Q：「原來係咁㗎，佢哋會唔會話你屋企人獨留兒童在家㗎？」
我：「我都唔知喎，老竇有研究過唔夠十六歲都可以叫獨留兒童在家，但如果個兒童識自己照顧自己就無問題喎，所以先叫返我阿婆去舅父度住，不過而家唔止獨留兒童在家喇，個兒童重拐帶未成年少女返屋企添，哈哈！」
Q：「鬼得閒俾你拐帶呀！返學就快啲換衫啦，我唔等你㗎喇，咪搞到我遲到。」
我：「妳不朽都唔會等我㗎啦。」
我屋企行出去走廊左右兩邊都係（車立）口，為咗唔好俾人發現我同佢過從甚密所以一直以嚟都係採取男左女右嘅方式出入，我諗佢自己都會好小心唔俾其他人發現佢出入呢啲公屋地方。




我：「欸…點算，我隻手包得太厚，個衫袖好戟…」
Q：「低B，著唔落就唔好夾硬啦，換件PE衫著風褸啦。」
我：「咁樣咪好奇怪囉…實俾全世界望住。」
Q：「鬼叫你傷咗咩，返去同Miss Tang講啦，遲到喇，唔鬼理你呀！」
我：「等埋我呀！」其實出門口就分道揚鑣。
落到樓下，未入校門已經全世界望住我，好似未見過靚仔咁，睇嚟我咁著真係型得滯。
入到校門，一堆『風景』已經張牙無爪咁行埋嚟我面前，彷彿前一世我哋有乜血海深仇。
紀：「呢位同學，請問你今日嘅服裝係乜嘢一回事呢？」通常佢哋係捉無攝衫，襪有logo，裙唔夠長呢啲無謂嘢，見到我呢啲boss級穿著反而一面狐疑好似唔知應該點處理。
我：「我想嘅咩…隻手傷咗我著唔到件恤衫呀！」
我拉開件風褸抽咗隻左手出嚟證明我所言非虛。




紀：「咁，想問下你有無同學校申請呀？」
我：「申請乜？申請批準我受傷？」
後面幾個低form風紀已經忍唔住笑咗出嚟。
紀：「咁你奇裝異服返學都要同學校講聲㗎。」
我：「乜奇裝異服…我全身上上下下都係正經校服嚟㗎！啲高form女仔頭髮加high light又唔見你哋捉？我又唔係日日受傷，鬼知啲規矩咩，我而家去搵班主任睇下點處理先囉。」
紀：「欸…不如你喺度寫低班別姓名先，如果有需要我哋再搵你跟進呀下。」
真係麻…Q煩！輕輕的我留下了數筆，不攝回一隻衫袖，頭也不回成個楊過咁飄到去教員室搵Miss Tang。
我：「早晨，唔該想搵鄧XX老師。」
直到而家我都覺得喺教員室門口大聲嗌先生出嚟呢個文化好低B，而又由於有幾個鄧老師，我哋迫住要嗌佢全名…