thriXt Qantasy 純文字安眠之作 (New: - U2K - 一直上架): 113

過咗一陣之後QQ攞咗碗熱辣辣噴住煙嘅東西出嚟，而佢自己就整咗個杯麪畀自己食。
其實我係可以理解嘅，整畀我嘅係迫於無奈，因為我要食啲好清淡嘅嘢，而既然佢對自己嘅手藝無信心，就當然唔會食返自己整嘅食物，安全起見無嘢係穩陣得過一個杯麪。
Q：「起身食嘢喇，交叉仔…」
我：「嗯…嗯。」我望住一碗白晒晒嘅米粉物體…
Q：「我第一次整㗎咋…最好唔好有啲乜期望。」
我諗…我啲期望係去咗相反嗰一邊。
我：「嘩…嗯啊…」我放咗一啖落口，實在驚為天人！應該可以媲美太空人食物。
Q：「係咪好難食呀？講啦…」
喺個碗入面其實得三樣嘢，就係米粉，白魚蛋，西生菜，呢個組合看似簡單，實則…
我：「首先，啲米粉實在煮得太耐，淋晒碎晒。」




Q：「呀下…」
我：「其次，無過冷河，直接用烚粉水嚟做湯，所以好似漿糊咁。」
Q：「呀下…」
我：「啲魚蛋係煮緊米粉先落，冰箱攞出嚟未煮熟入面重係凍㗎！」
Q：「唔好食喇！衰人！」佢一手搶咗我碗粉。
我：「唔緊要啦…Queenie，對唔住呀。」
Q：「好過份呀你！我阿媽都未食過我整嘅嘢㗎。」
我：「應該妳自己都未食過啦。」
Q：「咁人哋都未入過廚房嘅…」
我：「咦，奇怪喇，女仔明明有家政堂…」




Q：「咁有其他組員㗎嘛…平時都係Yvonne負責晒嘅，我係洗下嘢…同埋擺下盤㗎咋…」
Home E同DT分開男仔女仔上，同PE一樣會group埋隔籬班，所以佢可以同『好』姐妹Yvonne同組。
我：「咁考試呢？總唔會剩係考妳執頭執尾呀？」
Q：「唔好同人講…Home E係我唯一唔合格嘅一科。」估唔到女神都會有自覺羞愧嘅時候，見佢頭耷耷喺度㧻手指我都唔好意思再揭佢瘡疤。
但我覺得好合理，佢以前喺屋企係公主嚟，又點會得閒無嘢做無聊到走去玩煮飯仔吖。
我：「唔緊要啦，畀返我繼續食…」我搶返埋嚟。
Q：「算啦，太難食就倒咗佢啦。」
我：「點得喎！好唔好食唔緊要，最重要係妳嘅心意！妳親手為我煮嘅，食完直頭暖到入心！」
我用個湯羹潷起一堆米粉碎糊放入個口，眼泛淚光感激流涕咁望住佢，唔單止係因為感動，而且係因為真心好難食！但我絕對唔會倒咗佢，咁樣實在太hurt QQ，加埋我唔想捱餓或者自己再煮。
Q：「多謝你，如果論心意…邊夠你嚟喎。」




我：「呀，做乜無端端咁講呀？」
Q：「雖然喺呢度住其實唔算好舒適，但明明我只係嚟阻住你，你都會諗盡辦法去滿足我嘅要求，盡可能氹我開心，我…一直都好感動。」
女神呢下係真心感動，絕對唔會係因為個杯麪難食到佢喊，但眼下呢個實在唔係鬥感動嘅時間。
我：「QQ…」
Q：「交叉仔…」睇佢個樣好似想相擁而哭咁。
我：「點解碗米粉一啲味都無嘅？」
Q：「你受咗傷點可以食味精喎。」我都唔知有無根據，不過本身味精就唔係好嘢嚟。
我：「就算唔落味精都要落啲鹽㗎…」
Q：「你食唔食得㗎？」
我：「鹽有消炎殺菌作用，點會唔得？」其實㞗噏…
Q：「咁我入去廚房攞枝鹽出嚟畀你啦。」
趁佢入咗廚房，我即刻潷咗佢杯麪入面兩殼味精湯過嚟救命，如果唔係我真係會喊出嚟。
我：「靚靚右女神Queenie。」
Q：「係，請問乜嘢事呢？」
我：「呢罌係糖嚟㗎喎…」




Q：「…」