為了實現媽媽遺願，我成為了女兒國唐僧: ξζ’

買完飯返到嚟QQ佢重瞓到成隻死豬咁，都啱嘅，細蚊同我講過高潮完攬住我瞓係好舒服；見佢咁樣我都唔捨得嗌醒佢食飯，本來諗住自己趁熱食先，但最後都係想等埋佢一齊食，最多一陣先再蒸返熱；既然係咁我又上床瞌下先…呀，好想一齊瞓呀…
然後就到咗第二日，今日係我生日。
由細到大我都無慶祝自己生日，每次一諗起生日只會想起媽咪已經唔喺度…如果老竇喺香港嘅話就會帶我出去食返餐好嘅，但都唔會話同我慶祝生日；所以呢，我係好少同人提起我係幾時生日嘅，不過呢，每年呢一日我都有個好重要嘅任務。
今年多咗個Queenie喺度阻頭阻勢。
又唔係話阻住我嘅，不過係有啲唔習慣。
我：「妳今晚唔會出街㗎可？」
Q：「唔會呀，做乜呀？」
佢喺度玩緊佢部keyboard。
我：「無呀，我出去買啲嘢咋嘛。」
就係咁，我同佢一如往常咁一齊食完晚飯。




我喺雪櫃入面攞咗兩個雜果撻出嚟。
我：「Queenie…嚟吖，一人一件啦。」
Q：「嘩，做乜咁好有撻食嘅？」
十幾蚊件餅，呢一刻對我哋嚟講係有啲奢侈。
我：「無呀…我生日咋嘛…」
Q：「吓？！你做乜唔早啲同我講呀？」
我：「無乜特別啫，有乜好講。」
Q：「等我買定生日禮物畀你吖嘛。」
我：「唔使啦…我慣咗唔慶祝嘅。」
Q：「咁咪好慘囉？」




我：「慣咗就無嘢，咁妳下年有無人同妳慶祝？」
Q：「得返男朋友掛，希望到時未分手…」
我：「咁妳記得提早話我知。」
Q：「放心，呢個我一定會。」
我：「不過你最好唔好有乜期望，我都無乜同人慶祝過生日。」
因為自己唔慶祝，我都好少會問人哋幾時生日，小學嗰陣同學問我去唔去M記一齊過生日會，或者上佢哋屋企砌蛋糕，我都係會推得就推。
Q：「你年尾生日你咪好細個囉？」
我：「我媽唔想我做細B，所以推遲一年讀書，如無意外我年份同妳唔同，應該大過妳。」
Q：「哦，咁都係幾個月啫。」
十四歲QQ妹妹已經唔客氣咁開始品嘗件果撻。




而我，就喺個書櫃頂上面攞咗個紙皮箱落嚟，個箱入面有一個公事包，由於積咗啲灰塵喺上面，我好細力好細力咁打開條拉鍊，入面有一大堆信封，我喺一個熟落嘅位置抽咗其中一封出嚟，個面寫住15兩粒數目字。
Q：「嘩，你搞啲乜咁大陣仗呀？」
我：「係我阿媽寫畀我嘅…生日信…」