為了實現媽媽遺願，我成為了女兒國唐僧: Ag，Silver，銀，首飾，～1USD/g

順帶一提銀嘅拉丁文argentum，希臘文ἄργυρος, árgyros，所以符號Ag。

Q：「妖！咁污糟，我懷疑今晚就連殘廁都爆。」
我：「唔緊要，拖住手仔喺殘廁出面輪候，唔使攞籌㗎…嘻嘻嘻…一定好多人觀賞。」
Q：「你條契弟再講信唔信我帶埋佢上嚟扑嘢吖嗱？」
我：「嘩！妳唔係咁虐待我呀？好，我收聲…」
佢講到咁我真係有啲唔開心，睇住佢哋恩愛而自己做孤獨精…雖則睇佢畀男朋友扑應該會好精彩，但我受唔到之後要自己一個人打飛機嘅痛苦。
喺平安夜，我係一個無土地問題煩惱嘅小朋友，可以話係糧草已備，兵馬可期，只欠女女…
Q：「咪玩啦，你肯我都唔敢呀…你今晚無地（音：訂）去？」
我：「唔啦…自己一個出去睇人一家大細食聖誕大餐咩。」




Q：「唔好唔開心啦，乖乖地等我返嚟陪你喇。」
係嘅，而家我有咗Queenie做我屋企人已經好好多，雖然睇住佢去溫仔有啲難受，不過起碼有人同我謦下欬，唔知條仔會唔會又激親佢呢？
我：「係喎！我可以拆禮物喇喎！」
Q：「吓？我重以為你唔記得咗要留到耶穌復活先拆添。」
我：「哈，成四個月咁耐我真係忍唔到。」
Q：「乜呀，聖誕到耶穌復活總共用咗三十三年㗎！」
我：「哈，哈，哈，好笑呀。」
Q：「唔準唔笑呀！嚟，笑…」佢用手扯開我塊面。
我：「好爛呀妳，聖誕凍死我喇…重唔出門口？」
Q：「想睇埋你拆禮物吖嘛。」




我：「如果有條女上嚟畀我拆禮物妳又諗住戙喺度睇埋我拆先走？」
Q：「咁就唔止睇拆禮物啦，睇到砌埋先走啦。」
我：「咁變態嘅…我怕醜㗎。」
Q：「有女睺你先算啦！快啲拆啦，趕時間呀！」
明明份禮物係我嘅，點解佢咁鬼興奮…
左一刀，右一刀，鎅開啲封條…
Q：「嘩…我真係唔覺得你係貧窮屋邨仔囉！」
好大盒，堅無水份，入面係正版LEGO 42096號，TECHNIC系列嘅保時捷911跑車，總數1580塊，係我迄今為止砌過最大盒嘅積木…
我：「我都估唔到老竇咁重手…」
Q：「真係好可惡，羨慕死人喇。」




我：「快啲去拍拖啦，我開工喇。」
1580塊嘅積木，當我十秒砌一塊，一個鐘就砌到三百六十塊，即係我都要成五個鐘先砌得完，嘩！
最後當然唔止啦，因為機械系列嘅LEGO有好多我未見過嘅配件，有好多齒輪同軸芯，幅說明說畫得好立體睇到我一嚿嚿。
顧住砌砌砌，我連嘢都懶得煮，食咗個Queenie買嘅杯麪就算…嘩！頂！以後叫我點食合味道呀…明明都係日清出啫，呢隻…叫麺職人嘅杯麪好味得咁交關嘅？其實佢買嚟會唔會剩係預自己食㗎咋…不過我諗就算係佢都唔會投訴嘅。
最後我由三點砌到十一點幾先砌完，部完成品跑車係非常之大部，而且都好逼真下，的確係幾有成功感嘅，同以前只係堆疊嘅LEGO唔同，砌完呢部嘢學識咗好多機械原理。