thriXt Qantasy 純文字安眠之作 (New: - U2K - 一直上架): XVI

Q：「嗯？你唔一齊食呀？」
我：「唔喇，妳肚餓吖嘛，有剩先畀我啦。」
我顧住抄佢嘅英文作業，都唔理得咁多。
Q：「嚟吖，我哋一人一半呀。」
大家唔好諗多，佢絕對唔係咬住半粒蝦餃哄埋嚟叫我喺佢個嘴度咬走半粒蝦餃，只不過係佢食完一粒之後夾第二粒放喺我面前，用同一對筷子…咁我都唯有恭敬不如從命，擘大口吞入口中。
我好耐未試過有同家人一齊生活嘅感覺，同Queenie雖然只係同學，但我竟然覺得而家嘅氣氛鬼死咁溫馨，至於佢心口嗰兩團肉已經完全被我拋諸腦後。
原來女神食蝦餃個樣係咁鬼靚，明明只不過係公仔點心，佢都可以食到甜咪咪咁笑。
Q：「好好味呀，好耐未食過蝦餃。」
我：「點會喎，妳上個再上個禮拜先食完文華廳嘅蝦餃。」
Q：「唔好提喇，唔好影響我味覺。」




我：「妳講到咁好味我都想試下。」
Q：「試乜鬼吖，嗰度一籠蝦餃差唔多可以買十包呢啲蝦餃喇。」
後來我上網查過，一籠文華廳蝦餃連加一係要118.8蚊，極之接近我今次買嘅特價蝦餃十包嘅價錢，買完重有兩個二找返添，未至於食唔起，但食嚟唔知為乜，只係好想試下。
我：「如果有機會妳要陪我去食一次。」
Q：「我而家咪陪你食緊蝦餃囉。」
講完佢又送咗一粒蝦餃入去我個口入面。
食完蝦餃，抄完英文功課，我去雪櫃攞咗個蘋果出嚟食。
Q：「吓？估唔到你會食生果喎！」
我：「阿媽叫我食㗎嘛。」
Q：「欸？但你阿媽唔係…」




我：「做乜？阿媽死咗就唔可以叫我食生果㗎咩？」