為了實現媽媽遺願，我成為了女兒國唐僧: XII

我：「咁我抽返起張床單同被袋去洗先啦，妳今晚就咁瞓，女仔乾淨都唔會整污糟㗎啦。」
我再同佢換埋個枕頭套，搞完一大輪都已經五點幾，我認我係唔鍾意做家務，平時無三四個月都唔會洗一次嘅。
我：「Queenie，咁妳今晚換乜衫？」
Q：「我今日唔想郁喇…聽日放學先去舅父度攞。」
我：「咁妳今晚著乜瞓？著住校服？」
其實又無話唔得嘅…女仔無汗著乜瞓都係咁。
Q：「借住你啲衫畀我著先囉…」
我：「如果妳唔介意嘅話…妳自己去我櫃桶摷件啱心水㗎囉，不過入面亂葬崗咁。」
Q：「嗯，我夜晚沖完涼先換囉。」
我：「妳今晚諗住食乜？」




Q：「我無idea呀，你食乜我咪食乜。」
本來佢過嚟我係諗住出街食嘅，但佢講到而家咁悽涼，出去食餐夜晚要成四十幾五十，唔知佢捱得幾耐，而如果我要請埋佢，就變成我唔見八九十蚊，長久落去都係必死無疑；我係可以日日食杯麪為生，但無理由要佢好似我咁㗎，真係頭痛。
我：「我諗住煮麪食咋，妳一齊？」
Q：「好呀，唔該晒…」
唔好諗住我會整到啲乜好嘢出嚟，我平時都唔係啲乜善待自己嘅人嚟；兩個公仔麪，五蚊，一堆雜丸，十蚊內，一碗三色豆，三蚊到，叫做用最少嘅價錢煮到兩大碗麪出嚟；反正有味精就唔會入唔到口，希望Queenie佢食得落啦。
我：「求祈食住先啦…醫好個肚再諗。」
Q：「呀…係三色豆…」
我：「做乜？妳唔食㗎？」
Q：「又未至於嘅，唔太鍾意啫…唔緊要。」
佢講完就夾咗一大箸麪放入個口度，雪雪聲咁啜入去，超級無儀態，估唔到我可以有機會見到女神咁嘅一面。




我：「妳…好肚餓？」
Q：「嗯，我晏晝剩係食咗個雞尾包咋。」
我：「妳無同妳啲friend一齊食飯咩？」
Q：「無呀，推咗，無心機食…亦都無乜錢…」
Queenie本身係富家女平時一定大使過我，如果我要兩千幾生活一個月嘅話，佢起碼要三千蚊，每日一百蚊到…但佢如果無財政來源嘅話，可以點算，我搞唔掂㗎喎，無錢，放個女神喺屋企都無用啦，只會係負擔，唔會係享受。
Q：「呀！粒墨丸好難食！」
我：「欸…真係好難食？」
Q：「係呀，乜你唔覺㗎咩？好大唚雪味。」
我：「都真係幾難食…因為咁啱超市無特價，呢包喺佳寶是但執㗎咋。」
難食…我係知…但我都唔想，平時真係無乜要求。




睇到佢扁晒嘴咁，我都有啲唔好意思。
我：「我開罐五香肉丁畀妳啦，啲丸畀我啦。」
於是我去廚房開咗罐五香肉丁放佢面前。
Q：「點解唔係水仙花牌㗎…」
小朋友未必知，我當然知佢講乜，水仙花牌五香肉丁，黃色罐嘅，係市面上買到質素最高最穩定嘅五香肉丁，肉質偏瘦，但因為成本問題，茶餐廳都越嚟越少見。
我：「福字平三蚊吖嘛。」
Q：「你睇下，呢幾嚿都係肥羔嚟。」
我：「吓，我幾鍾意㗎喎，肥嘅妳畀我啦。」
女神…妳估我唔想餐餐A5和牛送公仔麪咩…