為了實現媽媽遺願，我成為了女兒國唐僧: 捌

限字數作文都幾好玩。

好唔容易真係等到放學，神奇地嘅係無人留意我哋呢對金童玉女兩個人偷偷地自己留喺課室，實在係太大意喇！其實只要大家提高警惕，小心翼翼，細心觀察，係可以踢爆好多地下情侶，甚至揭發大量荒唐嘅事情，例如眼鏡女學霸留喺自修室撫摸自己，運動女健將入黑球場裸跑，甚至狗男女喺女廁玩初音遊戲…咦？係乜嚟㗎…
而呢個時候Queenie仍然一言不發，到底想點呢？係想打我一身吖，定係投懷送抱呢？斷估就唔會揭開條裙畀我睇叫我研究佢身體嘅。
Q：「交…交叉仔…」
我：「吓…做乜咁叫我？」
Q：「你出面個朵唔係咁嘅咩？成個名都係交叉。」
補充一下，我中文名單字一個爽，因為貪佢最多交叉，而且英文唔用正常嘅song，而用xong，喺屋企人嘅惡攪之下我就俾人咁叫囉。
我：「點叫都好啦，妳…呢兩日…做乜呀。」
Q：「你可唔可以幫我一個忙？」


我：「盡量啦，能力所及，唔太過份嘅話。」
好驚佢搵我打人，仇家又好，男友又好，追求者又好，雖然我都打得下，但呢樣嘢好麻煩。
Q：「想問…你而家係咪自己一個人住？」
我：「係呀…基本上今年都係，做乜？」
Q：「可唔可以收留我？」
吓！喵？呀呢？何ですか？搞乜鬼…
我：「妳…要離家出走？唔好咁曳啦，我私藏少女實俾妳屋企人告到甩褲㗎喎…」
Q：「唔係呀…我無家可歸。」
我：「妳唔好講笑啦，有乜可能喎。」
係囉，佢屋企就算唔係大富大貴都爛船重有半斤釘吖，屋企冧咗咪去酒店住住先囉，啱唔啱？


Q：「嗚嗚嗚嗚…嗚嗚嗚嗚…」
點知佢嚟真，話喊就喊，似乎唔係講笑，我揦手唔成勢，即刻喺書包入面摷咗張紙巾出嚟，印落佢塊面上，點知佢直頭撲埋落我心口度喊…咁…我又唔係未試過嘅，但佢又唔係我女朋友，我唔可以抱返住佢，而佢都只係烏低身騭個頭埋我心口度，無黐埋對波上嚟。
咁，我咪雙手舉高，企到投降咁囉。
過咗五分鐘到，佢啲啜泣聲開始停止。
我：「Queenie，如果妳慘到真係要瞓街，都可以上嚟嘅，但我屋企唔啱妳㗎喎。」
講真我邊好意思用我間屋招呼呢啲公主吖，房都無間畀佢，周圍亂七八糟，就算我溝得掂佢做我女朋友，一開門見到我間屋都耍手擰頭走夾唔抖啦。