【重甜】好人難做，咁不如做個賤男: 七十四。上 利用
緣聚緣盡，乃世間常事，不必看重，也無須看輕。
譚家瑜坐在班桌上，搖搖腳，與她的同班同學說起戀愛八卦。看她年紀輕輕，卻說得頭頭是道，令眾人折服。
門外的阿朗沒有給予理會，只冷眼旁觀她的說教，儼如一名變態。
「阿瑜，你真係好似戀夏500日嗰個女主。」一旁的男同學輕輕笑道。
譚家瑜沒有過多反應，只淡淡地答︰「還好啦 ! 」
另一位男同學坐到她的身旁，肩貼肩地問道︰「咁你有冇鍾意嘅人先 ? 好似我咁呢? 你會唔會鍾意我呢一類人 ?」
譚家瑜見他的樣子極其飢渴，只聯想到狗公二字，但作為同學一場，為免尷尬，只裝作無意，稍稍拉遠距離。但狗公仍不死心，再度坐近她的身旁。
阿朗見狀，忍不住走進她的班房，幫忙解圍。
「喂 ! 唔係約咗圖書館等咩 ? 等咗你好耐喇 !」
「係喎 ! 爭啲唔記得咗添 !」譚家瑜秒速從桌上跳下去，遠離那名狗公，然後，扭身向他們揮手說︰「放學完再講啦 ! 我同佢仲有嘢做 !」
譚家瑜說罷，他們便一起轉身離去，一旁的狗公因食了檸檬，心感不忿地與他的夥伴說︰「咁多仔搵佢，一定唔係好嘢啦 !」
他的夥伴補充道︰「可能佢鍾意隔離班條仔呢 !」
「你哋收下把死人口啦 ! 」一眾女生帶著鄙視的目光望向他倆。
「講下啫 ! 講下唔使死嘅 !」語末，他們便抱著不屑的表情散去。
走出門外的兩人，不知班內對他們的議論，繼續向樓梯口前進。
「又真係幾warm喎 ! 怪唔得啲囡囡俾你媾晒啦 !」譚家瑜邊走邊笑道。
阿朗平常地答道︰「基本嘢啫 !」
「你有嘢想搵我 ?」譚家瑜一語道破阿朗的煩惱。
「你又知 ?」阿朗驚訝她的敏銳，竟看破自己的內心想法。
譚家瑜自信地用手捲弄自己的短髮，說︰「你個樣，同埋你點會無啦啦過嚟吖 ! 係咪關今朝爆咗校長搞學生嗰單嘢吖 ? 」
阿朗走到梯口，指著下方，示意他倆下樓︰「一半啦 !」
「咁仲有咩事呢 ?」譚家瑜跟著阿朗踏著梯級走下去。
阿朗答道︰「去到圖書館先講啦 !」
然後，兩人靜靜地走到圖書館，沿途上再沒有任何對答，只靜靜地走路。
到達圖書館的門口，阿朗抽出鑰匙，打開大門。譚家瑜十分好奇，為何一名學生又不是圖書管理員，又不是工作人員，竟會有大門凡鑰匙。
「點解你有鎖匙嘅 ?」譚家瑜探頭問道。
阿朗顧著開門，沒有詳細地答覆她︰「入到去再講啦 !」
他的隱藏，令譚家瑜覺得有種故弄玄虛的感覺，她有點不耐煩說道︰「喂 ! 唔好懶神秘先啦，講嚟聽下啦 !」
「入嚟先 ! 」阿朗帶著譚家瑜走進圖書館。
譚家瑜左顧右盼，如同小孩進動物園時的反應一樣︰「乜原來咁多書嘅咩 ? 我都唔知學校嘅圖書館係咁嘅添 !」
「你都唔睇書㗎啦 !」他說著笑，關上大門。
「係呀我唔睇書呀 ! 你唔好搵我傾囉 !」譚家瑜向他舉起中指，隨後走去擺放著經典名著的書櫃前，遂本查看︰「 阿姐都叫成日睇書㗎 ! 呢本同呢本我都有過，仲有呢本 !」
「百年孤寂 ? 會睇到瞓教嘅書嚟㗎喎 !」阿朗輕笑道。
譚家瑜揭開百年孤寂，說出小說最開頭的一句︰「 許多年後，當邦迪亞上校面對行刑槍隊時，他便會想起他父親帶他去找冰塊的那個遙遠的下午。」
阿朗聽到此句，更是歡喜︰「你都識少少嘢吖 !」
「咩少少 ? 多多添啦 ! 」譚家瑜合上書本，將其塞回書櫃，再道︰
「你有咩煩惱搵我先? 見你有幫襯daddy間診所，今次唔收錢做樹窿啦。」
「嘩 ! 原來要收錢㗎 !」
「咁你講唔講吖 ?」
「其實呢係咁嘅……」
時間回到昨天的咖啡廳……
「不如我哋生仔吖 !」Miss Lee正正經經地對著阿朗說。
「……生……仔? 點解……」阿朗被她的說話弄得支吾起來。
Miss Lee垂低頭，緊握自己的手心，身體開始微微顫抖。
「因為屋企人迫緊我結婚…… 但係……」她欲言又止，阿朗見狀，站了起身，坐到她的身旁，安撫道︰「慢慢講 !」
「係囉 ! 有咩慢慢講啦 !」凱晴也不知從哪裡蹦了出來，把收銀處的盒裝紙巾放到枱上。
Miss Lee向凱晴道謝︰「唔該晒 !」
「唔使 !」凱晴淡淡地答道。
水火不融的兩人竟放下隔膜。縱使平時還是剛才，她倆都是見面即開戰，但此刻的情況，卻有流出露半點溫馨。
Miss Lee簡單梳理了情緒後，對著他們娓娓道來事情的來龍去脈。
「一直以嚟我都有婚約係身嘅，只不過一直都俾我用返工做藉口推遲咗，更何況，而家呢個時代仲邊有人會盲婚啞嫁吖 ? 嗰陣時我就喺度諗，會唔會男方其實都唔係幾想盲婚啞嫁呢? 但係後來就發現，原來victor佢係真心鍾意我……」
凱晴不留情地問道︰「所以你都鍾意佢 ?」
Miss Lee馬上為自己申辯道︰「唔係 ! 無論以前定係而家，我從來都冇鍾意過佢，於是乎我係諗住拒絕呢頭婚事，但到最後屋企人並唔同意，因為victor佢係合作夥伴嘅太子爺，所以…… 所以……」
凱晴聳起眼眉，瞪大眼珠，面貌兇惡的她再次問道︰「所以你就選擇接受呢頭婚事 ? 繼續做你屋企人嘅奴隸 ?」
Miss Lee用力拍了枱面一下，弄得周遭的客人把視線轉向他們︰「唔係，我唔想再做奴隸，受夠喇 ! 」
凱晴翹起枱下的腳，回復平靜的面貌，又問道︰「咁你諗住點做 ?」
「我希望可以同阿朗奉子成婚 ! 只要有咗bb，咁就……」語末，Miss Lee轉眼望向阿朗，她的目光是懇求的。
「啪」
突如其來的拍枱聲，打斷了正在講述來龍去脈的阿朗。
「其實佢只係利用你 ! 」譚家瑜激動地站了起來。
她環顧圖書館四周，確定沒有人在館內，便續說道︰「你應該唔多唔少都感覺到啦，所以你而家先咁苦惱 !」
阿朗仰天嘆息︰「唉 ! 之前佢有幫過我嘅，但可能佢都係為咗擺脫婚約先咁做……」
譚家瑜坐回椅上，問道︰「你好唔捨得佢? 好想救到佢?」
阿朗點了點頭。
譚家瑜嘆出一口氣，再道︰
「你咪同佢生仔囉 ! 咁咪救到佢 ! 明知人哋利用你咪照去囉 !」
阿朗頓時語塞了。
譚家瑜盯著阿朗的臉，問道︰「喂? 做咩粒聲都唔出 ?」
「冇嘢…」然後，他站起身，準備離開。
譚家瑜也跟著站了起身，叫停他︰「喂 ! 你仲未講埋校長單嘢吖 !」又問道︰「究竟發生咗啲咩事 ? 點解無啦啦會爆咗出嚟 ? 係唔係都關你事 ?」
阿朗扭身持著憤怒的聲線，說道︰
「我都想知吖 ! 」
「嗰個係你條女個阿媽喎! 你會唔知 ?」
「 我真係唔知 ! 仲有點解你會知佢係思穎阿媽 ?」
「你唔需要知，同埋嗰啲受害者係咪本來應該有你份 ?」
「……」
「即係本來有你份啦! 我都心諗點會冇你份。」
「關你鬼事吖?」
譚家瑜不屑地罵道︰
「你真係好撚賤 ! 正一仆街嚟 ! 連條女個呀媽都食埋 !」
「你講咩話 ?」
「我話 ! 你真係好撚賤 ! 除咗條撚大少少之外，就乜用都冇 !」她話聲未落，阿朗已抓起她的衣領，怒吼道︰「你食屎啦 !」