我嘅工作就係揀我鍾意嘅女仔拍拖: 談心

自從嗰次同Kylie食完糖水之後，我同佢好順理成章咁會繼續約，我地會keep住有聯絡。另一邊廂我亦都每個禮拜keep住至少一兩日會去拳館同Rainbow打拳，然後打完就一齊食飯。

「新女呀？」坐係對面嘅Rainbow望住我話。
「嗯..算係啦…。哇屌好辣..！」我啱啱比啲辣椒入咗喉嚨。
「你睇你，做錯嘢啦，個天都懲罰你」佢口係咁講，但隻手都係幫我開緊支烏龍茶。
「咳咳….頂你.…咳！」比辣味直接攻入喉嚨真係好辛苦..，好似比火燒咁。
「你唔好講嘢啦…！快啲飲啖先」Rainbow遞咗支茶比我，佢成個擔心樣寫咗係塊面度。
「…」我大啖大啖咁飲咗幾啖烏龍茶，條喉嚨終於都舒服啲。
「你呀..，成日都係咁！食嘢唔好講嘢呀嘛..」佢有啲責怪咁講。
「哇…明明就係你問我嘢」我話。




「我…，咁你可以食完先答嫁嘛」
「係係係～」
「咁，你係咪..食咗啦？」佢問。
「下？」
「係咪食咗..」
「食咗？仲有嘢食呀，唔夠再叫啦」我話。
「我問！你係咪食咗條女啦！」佢有少少燥咁大聲講，最戇鳩就係永遠呢啲時候周圍都好靜。
「…….可以唔洗咁大聲嘅….」我望一望周圍，附近嗰幾枱都望住我地，隔離對情侶仲差啲忍唔住笑。
「咁…你係咁聽唔到…，我咪大聲啲囉」佢有啲唔好意思咁講。
「得啦…。未呀，邊有咁快，拖都未拍」我將音量收細少少。




「下，唔似你喎～平時好快到手」
「佢好似好純..」我話。
「點解呢句嘢咁熟面口嘅呢？好似以前都聽你講過嘅？」佢抽我水。
「屌…，今次真係純呀」
「呢個年代真係得返兩種人係純。一係初中生，一係佢好唔掂」佢話。
「我真心feel到佢係好善良嗰種，搞到我好唔忍心」
「好多女人一開始都扮到咁嫁啦，咁純又去玩speed dating？」
「唉唔同你坳」我話。
「咁你係咪唔做呀」
「我唔知」




「咪係囉，跟本講嚟都冇意義…，講完你咪又係咁」佢有少少嬲。
「..」我唔知點覆佢，淨係坐係度食嘢。

突然間，Kylie打比我。
「喂？」我好好奇佢點解會無啦啦打比我。
「….」我聽唔到有聲，即刻較大聲啲部手機。
「喂？」我再喂。
「你..係邊呀？」耳仔聽傳嚟Kylie嘅聲，但佢把聲好細聲，直覺話比我聽有啲嘢發生咗。
「我係尖沙咀呀，做咩啦？」
「我…我…」佢好似喊緊。
「…你係邊呀？！」我最唔忍心見到女仔喊..。
「我係…係我屋企樓下..」佢話。
「我而家過嚟，你等我半個鐘，好快」我邊夾住部電話邊執緊我啲嘢準備走。
「…嗯…」佢講完就收咗線。
「邊個打比你呀？」Rainbow問。




「下次打拳再同你講..～你碌呢張卡啦，得閒先還返比我啦」我係銀包抽咗張信用卡比佢就走。
「喂..！」Rainbow想叫停我。
「掰～下次見啦！」我急急腳走咗。

落咗樓之後拎返架車就即刻去Kylie住嗰頭，佢住青衣，呢度過去可能都要一段時間。我揸緊車嘅時候不停係度諗緊佢點解會喊，至少應該唔會係情傷，因為佢都冇拍拖。屋企人？朋友？事業？都係唔好亂諗，揸快啲好過。我差唔多到嘅時候再打要次比佢，問下佢exactly係邊個位。佢話咗比我知之後我嗱嗱臨泊好架車，然後就行去搵佢。

佢坐咗係海濱嘅長櫈，我望住佢嘅背影，唔知點解心好酸，好似有種睇悲情戲嘅感覺。我慢慢行埋佢，然後坐咗係佢隔離。佢望一望我，然後再望返住前面。雖然心入面有好多問題想問佢，但我冇出聲，因為唔破壞呢一剎嘅寧靜。過咗幾分鐘，佢終於講嘢。
「Sorry呀..咁夜叫你嚟」佢把聲仲有少少喊完嘅感覺。
「傻啦，我自己話過嚟嫁嘛」我話。
「你唔問我咩事嘅？..」
「我諗住靜靜地陪下你，如果你想同我講就會講」
「…你真係好唔同」佢話。
「唔同？」
「同其他人好唔同…」
「哈哈係咩…」未試過有人咁講我。




「嗯…好細心」佢細細聲話，有啲怕醜。
「係咩..」我話。
「嗯..～我好似冇咁唔開心啦」
「有人陪係好好多嘅」
「多謝你..呀文」佢怕怕醜醜咁講。
「唔洗～」我講完又再靜咗。

今次我咁急趕嚟其中一個原因係佢係我嘅客，但我自己知道，更多嘅係擔心。Kylie比我嘅感覺都好特別，有少少似呀妹嘅feel。同佢相處落佢好天真、好善良。善良到，我都唔忍心對佢落手…。但係如果我今次唔做，分分鐘份工都冇埋。冇咗份工，我就唔會再有藉口去見嗰個人。

Sorry Kylie..，我…冇得揀。

有些痛未懂得痛都會懂
未親手抱擁過但我 都猜得透結局
未有親吻過 未有爭拗過
未開始相愛都應該結束