我嘅工作就係揀我鍾意嘅女仔拍拖: 每一位前度
「我係做event嫁」Kylie話。
「哦～你係做搞event嗰種，定係做media 嗰啲？」我問。
「我係負責統籌呀，咩都要做下咁。咁你呢？」
「我係投行做，不過我諗緊轉工哈哈」
「哇，咁咪好高人工囉！點解轉工阿」佢問。
「唔係高啦…，還好還好。因為我公司加人工嘅升幅有啲低..所以諗緊去唔去另一間」我是但吹咗一啲嘢，純粹為咗我嘅背景睇落更加真實。
「哦..，咁如果轉工之後人工多好多就唔同講法..。不過真係羨慕～我呢行好似轉極都唔多咁…哈哈」佢話。
「傻啦～最緊要自己鍾意姐，如果你每日都做緊啲自己好唔鍾意做緊嘢，咁人生會好痛苦」
我講完之後，反而提醒咗我自己….。究竟而家做緊嘅嘢係咪我真係鍾意做，定係純粹仲執著係一個位…一個幾年嚟都冇答案嘅迷。呢份工有時會比你遇到好多好有趣嘅異性，你有本事就可以同佢地拍拖、上床。但係一日唔辭職，你都冇辦法搵到一個同你過世嘅人。唔通你同另一半講，我嘅職業就係去speed dating 度揀女仔同佢拍拖咩..。係外人眼中我地同full time boy friend 冇咩分別，只不過以呢種形式唔算係直接嘅買賣。客比錢公司，公司出糧比我，我去做媒同客拍拖。最初因為一時衝動先返咗呢份工，點知機緣巧合之下一返就返咗咁多年…
「係呀～所以我抱怨還抱怨，但係始終都係鍾意做呢一行」佢笑一笑咁話。
「咁咪幾好～係呢，你平時….」我地繼續傾多咗陣就轉人。今次我將個目標放咗係Kylie，所以其他人我都冇咩點理，求其敷衍咁講下嘢就算。
今次Speed dating 終於完，我坐咗係其中一張櫈，望住Kylie啱啱走出門口，我就打比佢。
「喂…？你係？」
「我係呀文呀」我話。
「哦..！哈哈，我未save你電話呀！啱啱正諗住入～係喎，你做咩打比我嘅？」佢問。
「冇呀～問下你食唔食糖水炸～」我問。
「好呀～可以呀！我係樓下等你呀」
「哈哈好，我落緊嚟啦」我話。
「好啦～掰掰～」
「掰～」
落到去見到佢企咗係一邊㩒緊手機，我慢慢行埋去。
「喂～行啦～」我拍一拍佢膊頭。
「哇…！你嚇死我啦..！」佢彈一彈起。
「哈哈，睇咩睇得咁入神呀？」我問。
「冇呀～碌下IG炸嘛」
「哦～係呢，你知唔知附近邊度有糖水食」
「下..？你話食糖水但你唔知有咩食？」佢有啲無奈咁話。
「哈哈，唔得嫁？我知有一間嘅..，不過睇下你有冇preference 炸」我話。
「我冇所謂呀～都可以」
「好～咁帶你去嗰間」我講完就同佢一齊行。
「點呀，啱啱啲仔仔高唔高質呀？」我笑一笑問。
「哇～講到佢地好似係你啲仔咁」佢話。…有一個真係我地公司啲仔…，唔知佢今晚點。
「哈哈，佢地冇約你咩？」
「有呀，有個約我完咗睇戲，我話唔想咁夜..」佢講。
「所以同我食糖水係因為冇咁夜？」
「唔係啦…！佢怪怪地」佢有啲尷尬咁講。
「我都怪怪地嫁喎」
「咁我唔食啦！」佢扮嬲咁行一行走咗。
「哈哈得啦得啦，行啦～」我講完佢仲扮嬲，但一樣係跟住我行。
去到糖水舖我地叫咗個嗰度好出名嘅仙草兩個人share，有時我覺得男人真係要多謝呢啲舖頭設計到啲嘢大大碗，然後女仔焗住要同人share，變相比咗大家一個同異性「食同一碗嘢」嘅機會。
「哇真係好大碗..！好彩你話share炸..！唔係真係食唔唒」佢講完之後拎起咗隻匙羹，然後食咗一啖。
「係呀～我上次自己一個食，差啲中伏」我都食咗一啖…，正。
「邊有男仔自己一個食糖水嫁～」佢笑我。
「車！糖水一定要同人食嫁咩。一個人原來都可以盡興～」我唱咗林家謙嘅《一人之境》。
「你都鍾意林家謙！！！！？」佢勁興奮，差啲捉住我隻手。
「好鍾意呀！佢勁正」我話。
「係呀！！把聲又獨特，又識作曲，又靚仔！」佢好冧咁講。
「係真係幾正，但你講到好似想嫁比佢咁喎」我笑佢。
「想嫁！做佢老婆一定好幸福，日日聽佢唱歌」
「我覺得如果女仔做我老婆應該都會好幸福，我日日沖涼嘅時候都唱歌～」我話。
「咁厚面皮！不過…你唱歌都唔差嘅…」佢話。
「係呢～」
「嘻～不過林家謙好好多！」
「….係啦係啦，嫁比佢啦」我扮到好不屑咁。
「我嫁比佢又關你事～食糖水啦你～」佢整咗個好可愛嘅樣。
「哦～多謝」我將成碗仙草拎去我嗰邊，然後唔比佢食，
「喂也！！我要食..！」佢想搶返返嚟。
「唔得喎～」我又食多啖。
「頂你..！」佢伸咗隻手去捉住我拎碗嘅手，然後另一隻手拎返個碗返嚟。
「好啦好啦你食啦！肥死你～」我話。
「肥你嗰頭…！咁衰嫁…」佢好似有啲在意人地講佢肥。
「講笑講笑，你好瘦呀，真心一啲都唔肥。唔同你爭啦，慢慢食啦～」我驚佢唔開心，好真心咁安慰返佢。
「嗯…」佢烏低頭一啖一啖咁食。
望住佢食糖水嘅樣，我知道溝到佢只係時間嘅問題。佢比我嘅感覺好乖但又好活潑，好奇心驅使我會想更加了解佢。不過我而家最大嘅問題係，就算佢係一個靚女，我對住佢都唔會再有心動嘅感覺。我遇過好多唔同類型嘅女仔，其實大部分嘅性格都係差唔多。我開始對佢地失去咗興趣，工作令我對愛情好麻目。而家嘅我去到一種狀態，就係性愛只係滿足我嘅生理需要，心理層面完全得唔到滿足。就好似一個失去味覺嘅人，因為我嚟講，食鮑魚同食白飯係冇分別。純粹係我需要靠食物去維持生命，所以我食嘢。呢份工係好多人眼中可能好爽好正，返工溝下女食下女就有錢收，做男仔又唔會蝕抵，仲要我可以揀女。不過當你做落你就知，佢會令人冇唒味覺，甚至乎失去唒食慾。
我同Kyile一樣鍾意林家謙，但係林家謙好多歌都好虐心，特別係當你經歷過類似嘅場景嘅時候。做咗咁耐呢一行，對比我飛嘅女仔總係會有啲內疚。因為我知道，就算我同Kyile最後係點都好，佢都只會係我《下一位前度》。
未結識到你 竟已先鼓起
捨得的勇氣 放下的志氣
不想找到你 就像前度再一起
期待順序遇著下一位的你
至少像漫步從容地別離
就算一說起 記起 別再和前度媲美
若覺得第一位最愉快
為何上一位不釋懷
誰亦在反覆錯愛之旅捱大
沒法想下一位的生涯
寧願能白首 還是罷手
彷彿怕 麻木便老得很快
不想哭笑純熟得這麼快