《我將一位宅女變成女神，然後再將自己變成佢隻兵》: 上集 (10)

第二日
 
我同各位莊員一齊開會，分享返大家所做既政綱，要準備一黎政綱發佈會同埋準備制作宣傳單張派發，同時間都要準備一下點樣"哂莊"。所謂既"哂莊" 就係係中大校園內放置有關我地參選學生會既野，同埋我地莊員會係現埸宣傳同各位中大學生交流意見，目的就係讓更多中大學生可以見到我地。另外，經過多次開會討論，我地決定唔會"嗌莊"，所謂既"嗌莊"就係一路大叫口號，以更多人聽到我地聲音同知道我地既野，但因考慮到會煩到其他人，最終決定唔會"嗌莊"。
 
經過多番時間修正同制定，政綱可分為
政綱─釋閣
政綱─(1)校政事務
政綱─(2)高等教育
政綱─(3)香港政治
政綱─(4) 香港社會




政綱─(5)中國議題
政綱─(6)學生福利
 
『我地將會一月發佈同埋進行一連串參選事務工作，而二月就係我地正式既投票期，所以都係個句....下年既一月開始，我地將會好唔得閒，希望大家有個心理準備。』 我向各莊員說。
 
『我地"靜變"一定可以憾嬴阿風支"中連"!』阿龍說。我地內閣名就係靜變，主要係我改，想表達出希望阿靜可以變返以前既佢，但當然我無咁同大家講，只係求其作個意思係指中大應該以靜而變，不求急進，靜靜地作出改變，包括校政，學生福利等等。
 
『另外......我地可能會洗好多錢，我地應該會over我地當初既預算，所以大家都好好準備金錢，隨時要比額外開支出黎。』
 
『唔係呀化......要洗錢架?』莊員開始有D微言。




 
『我地既對手財力雄厚，唔只印大量單張，仲派發紀念品，所以我地都需要洗多少少黎宣傳。』我試解釋。
 
『唔係有得報數拎返錢咩?』有莊員問。
 
『就係有都唔會係即時拎得返，而且我地係over左預算，可能拎唔返，格離支莊都係私人禁錢出黎。』
 
『咁佢玩哂啦!』
 
『大家冷靜D，我地選個陣唔係已經意識到對手好強，我地無咩勝算? 又唔洗咁激心，而且就算佢地有錢去做更多既宣傳，我都唔覺得咁樣對學生會選情有幫助，參選唔係鬥洗多錢既。』




 
『民建聯年年攪蛇宴，都吸引好多票去支持佢地啦。』有莊員說。
 
『咁我地中大學生唔會咁無腦既，我地只要打好份政綱就得，做好本份。』我試說。
 
『唉!是但啦!』莊員開始講D悔氣說話。
 
『我地唔可以未打先輸，我地一定要撐落去!』阿龍大叫。
 
可惜各莊員都沒太大回應，氣氛比較沉靜，因為近來既Exam，Paper都折磨緊班莊員，見佢地咁唔得閒仲要研究份政綱，我都覺得好慘。而我都無咩時間去溫書，所以我預左我成績會唔高分，但我都無悔，讀左十幾年書仲讀唔夠咩? 眼看身邊既同學仔為左GPA (成績)而你鬥我鬥，大家都為左高分而自私，明明大家都係好朋友，但當一齊做Project時侯，就會我怨你唔做野，怨你能力唔夠，大家關係因為功課而惡化。
 
其實點解要咁? 可能有人認為GPA就係金錢，將來exchange同搵工都係睇你GPA，什至有人覺得我地選學生會係多餘，上莊已經夠ON居，仲要上大莊。哂錢，哂時間，燃燒GPA。但大學其實係一個充滿機會，充滿資源去鍛練自己，增值自己，而唔係一味摺埋自己係到讀書。
 
咁樣就算你得到GPA，但你社交，人際關係，人生經歷都遠遠輸比人，出黎社會，你只係一個高分低能既人。一諗依樣，就諗起我地師兄 "中大碩士失業漢"。佢就係一個經典例子。
 




不過GPA同u life邊樣重要，依個問題一直都討論至今，無一個特定答案，如何選擇，基於個人。
 
而我就無悔參選學生會。我一定會盡力去嬴依埸仗，打低阿風。
 
開完會後，阿雪又係因為要幫人補習而離開。我就同阿龍佢地一齊食lunch吹下水。
 
『近排好多野做，我地依班人開始意氣消沉。』阿Sam一路篤住杯檸茶一路說。
 
『唉..........我都好煩。』阿龍係到呻。
 
『你又煩咩呀? 』我問。
 
『咪阿May囉! 我都唔知佢諗緊咩，之前用你個招問卷比佢填，佢單身，之後我就開始展開攻勢追佢啦，上次我地仲約埋一齊溫書，我地都幾sweet! 但之後佢開始要攪莊務，聯絡就愈黎愈少。唉!』
 
『原來你已經開始左攻勢啦? 』




 
『唉! 我好似太過急咁，你睇下我地對話。』接著阿龍就比個Facebook inbox既對話比我地睇，從對話之中，阿May既回覆得好少同埋好短，反而阿龍講得仲多野，好明顯阿May唔係咁想理佢。
 
『你好似狗公咁!』我說。
 
『屌! 咁我地識架嘛! 佢又成日唔應人，又應得慢! 我咪急囉!』
 
『你咁樣擺到明想媾佢啦!會唔會嚇親人呀?』阿Sam說。
 
『嚇親佢既話就唔會同我出黎一齊溫書啦，真係好開心sweet架!』阿龍反駁說，因為佢覺得阿May唔係討厭佢。
 
『可能佢最近真係唔得閒呢，遲下放sem break(放假)佢得閒咪再約佢地出黎玩囉。』我說。
 
『唯有咁架.....唉! 係喎! 咁你呢? 追阿雪追成點?』
 




『我琴日捉棋.....唉!唔講依個，總之阿雪一路都陪住我，好正! 我愈睇愈覺得佢索! 佢對腳...真係..嘩! 但暫時都無咩進展。黎近星期日約左佢睇戲，希望有D進展啦。』我都唔知點講琴晚捉棋嬴定輸。
 
『聽你成日講阿雪，阿雪真係一個好女仔，你要加油呀!』阿龍說。
 
『唉....其....實我最近都好...好煩。』阿言吞吞吐吐說。
 
『妖! 佢地就話煩媾女姐，你又煩咩呀? 又媾女呀? 』阿Sam對住阿言說。
 
『我.........都係無野。』阿言似乎有野講想分享，但都係收埋入心入面。
 
『總之大家加油啦! 又要上莊又要媾女又要讀書，雖然辛苦，但都算係回憶呀!』阿Sam說。
 
『你又唔媾?』我問。
 
『洗咩媾? 我一早有女啦!』阿Sam說。




 
『屌你!你幾時有女架!!冇聽你講既!』阿龍說。
 
『挑! 好多野你地都唔知啦! 唔講咁多! 我要上堂。』阿Sam一口氣飲盡杯檸茶就走左。
 
『個死仔丫! 又收埋密密食!』阿龍說。
 
『阿Sam都得左，我同你都要努力加油!』我對阿龍說。
 
『咁......我呢?』阿言加把口說。
 
我同阿龍異口同聲說 :『你返屋企啦!』
 
阿言: 『屌!』
 
 
(第一部份完結)