《我將一位宅女變成女神，然後再將自己變成佢隻兵》: 上集 (9)

第二日
 
『唔講啦，我要去比賽。』我收恰一下文件就離開，因為答應左阿靜，我要去參加象棋比賽。
 
『你比咩賽呀?』阿雪問。
 
『象棋呀，有興趣?』 我問。
 
『好呀，我黎睇你玩呀!』阿雪就收恰文件同我一齊去。
 




『都無聽你講過你會參加依個比賽。』一路行去，阿雪一路問。
 
『都係朋友叫我參加，你知啦! 依D野邊有人係大學玩。』
 
點知，當我地去到比賽埸地，竟然比我想像中多人，至少都有三十幾人。不過好多都係睇，都係撐D Friend而黎。
 
『喂! 阿明! 依到呀! 快D黎登記。』阿靜揮手叫我過去。
 
我同阿雪行埋去，我就係到填表。阿靜望住阿雪，就問 : 『你係阿明個朋友呀?』
 




『下?係呀! 我黎支持佢。』阿雪突然比個陌生人問，一時之間比唔到咩反應。
 
『我係阿明既好好朋友，佢成日黎我屋企食飯，佢仲住我格離屋。』阿靜似乎想向阿雪示威。但點解咁做?
 
『丫...原來你地咁Friend! 哈哈。我係佢同學.....』
 
『填完!』說罷，我交個表比阿靜，本來想聽多D阿靜同阿雪既對話，但都係算。拿拿林登記比賽好過。突然間我有一個念頭，不如利用阿雪去激下阿靜都好。
 
『坐係邊?』我問阿靜。
 




『係最角落個到。』阿靜指住身旁既方向。
 
我聽到後，就輕輕拉住阿雪一齊行過去。再偷偷地望一望阿靜既眼神，佢一直都望住阿雪，似乎好似有D嬲。哈! 我目的達到。
 
當我坐低後，一直聽大會司儀宣佈比賽規則，分三局兩勝制，嬴左既一方先可以晉級，時間仲有一分鐘後開始。我望住前面張空椅，可能參賽人數太少，隨時不戰而勝，咁仲好。現埸氣氛開始沉重起來，本來好嘈既環境都開始靜落黎，始終捉棋係要求個氣氛要靜，各人都少出聲，靜靜咁等待比賽開始。
 
『有冇信心呀?』阿雪細細聲係我耳邊問。
 
『當然有，不過今埸可能無人同我比賽! 不戰而勝! 哈!』
 
『哈!』
 
有阿雪企係我後面支持我，令我諗起一句 " 一個成功既男人背後一定有一位女士支持"
時間仲有十秒，睇黎我真係不戰而勝。正當放鬆之際，有個人突然坐左係我面前。
 




依個人就係阿風。
 
『係你?』我驚訝地說。
 
『Hello! 估唔到第一埸對手就係你。』阿風充滿信心地說，意思係咪想講我好易對付?
 
『比賽正式開始!!!!!大家加油!!!』司儀大叫。
 
『我都估唔到你都會參加依類比賽。』雖然比賽開始，現埸即時傳出無數既下棋聲音，但我同阿風仍然未開始。
 
『係阿靜叫我黎。我見得閒，咪順便過黎玩下。』阿風說。
 
說罷，阿靜就行埋黎: 『咦? 你地仲唔開始? 』
 
望住阿靜企係阿風身旁，不禁令我有點生氣，學生會選莊仲有排先分勝負，既然有個機會打低阿風，我就要好好把握，我更加要係阿雪同阿靜面前親手打低阿風。




 
『我地開始吧。』我充滿敵視眼光望住阿風。
 
『多多指教。』阿風感受到我既殺氣，覺得好興奮。因為佢正正同我諗法一樣，要係阿靜面前親自打低我。
 
比賽正式開始。
 
我情緒有點不穩定，而且仲好緊張，手汗都出埋。原因係因為對手係阿風，佢個種鬆容不迫既態度令我感到好大壓逼感。再望一望身旁既阿靜，點解佢會企係阿風格離，係因為阿雪係到嗎? 定係其他原因?
我自問捉棋技術唔會差得去邊，雖然好耐無捉，但以阿風黎講，佢依個人點會捉開棋，讀書佢就佢叻，捉棋會夠我勁?
 
不過事情無我想像得咁簡單，阿風每一步都係殺著，而且好明顯佢一步都經過心思熟慮，可以見到佢既棋路已經預測到我將會點行，下一步又應該點行，佢根本唔係一個新手。更加唔係但求玩玩下，佢根本就想嬴。
 
由於我情縮有D唔穩定，加上分心。開局開得好差，雖然努力咁追返失地，但依然比阿風食住上，結果第一局我認輸了。
 
我握緊拳頭心諗 :『激氣......阿風係咪真係屈機? 捉象棋姐，點解可以捉到咁勁。我望一望佢，佢嬴左一局個種傲慢態度，就好似好輕而易舉咁嬴，仲係咁同阿靜講自己勁唔勁。屌佢老味，睇少我?




依個比賽突然間對我黎講變得好大意義，之後我將會同佢憾莊選學會，好多人都將我同阿風比較，雖然表面睇我係輸哂，但唔代表我廢。但只有係依個棋局上，我係同佢平起平坐，我地係對等。既然係咁，我更加要爭氣，我要嬴。
 
第二局正式開始。
 
『阿明! 你攪學生會攪成點? 』阿風突然問。
 
『....................』但我無回應佢，我專注地望住棋局每一隻棋，係到諗緊點樣佈局。
 
阿風見我咁專注，不禁微笑。
 
第二局我沉著應戰，每一步我都好小心咁行，情緒都開始穩定落黎，雙方都鬥得難分難解，手上既棋都開始所多餘無幾，開始進入膠著狀態。突然間，見到阿風下棋時，我即時大叫: 『飛將!食! 我嬴左!!!』 我興奮得即刻大叫勝利，雖然好似小學雞咁，但嬴左個刻既情縮真係壓唔住。
 
『飛將? 咩玩飛將既咩?』阿風有點不明白。
 
『嗯，依埸比賽係可以飛將。岩岩大會都宣佈左。』阿靜解釋。




 
『哈! OKOK! 我遲黎所以聽唔到宣佈! OK! 我輸!』
 
雖然好似嬴得勝之不無咁，低最終總算險勝一局。暫時比數係1比1。
 
我同阿風將會係第三局分勝負，由於其他人既比賽都結束，好多人都開始注意到我同阿風既對決，有部份人更認得出我地將會參選學生會，唔少人都話依埸係選學生會既前哨戰，突然之間，好多人都擁埋黎睇。令到我更加大壓力。
 
由於身旁太多人留意既關係，我開局開得好差，有好多步都犯左好多錯誤，阿風依然佔左上風，食住上。我將棋局上既兵將幻想成我既莊員，提醒佢地要爭氣，同時都幻想到阿風帶領住一班莊員慢慢攻擊我地。
 
雖然隱若聽到身旁既人話我輸梗，但我仍然扮哂充滿自信咁，正所謂輸人唔輸陣，我唔會輸!
 
我沉著應戰，冷靜自己。但阿風實在太強勁，佢睇通整個局勢，而我來來去去都係個幾招，丫......點解? 點解我行棋行到好似有個模式? 我係依局所捉既棋，同前兩局所行既棋路差唔多，根本就無變。原來我不知不覺捉棋係行緊一個模式，只係因應阿風所捉既棋而改變左少少，我竟然去到第三局先知，但阿風.......
 
『阿明，其實你覺唔覺得你棋路實在行得太明顯，一開始就想試下重炮將，之後就會想辨法放兩隻車出黎，但你過份依重雙車，重炮將依招唔Work，不但將自己既棋塞左係前面，而且你無好好利用雙馬進攻，一直放係後面。估唔到你捉到第三局仲係咁。』阿風邊望棋盤邊說。
 
我吞了吞口水，自知技不如人，第二局之所以嬴阿風都係靠運，如今整個局勢都比阿風睇透，我都無第二招去應付，一直任由阿風魚肉。
 
『阿明.....加油呀!』阿雪輕輕拍我膊頭說。但阿雪唔係好識點捉棋，佢根本唔知道盤棋我已經輸左，我既棋愈黎愈少，理論上我已經輸左。
 
我咬緊牙關仍然堅持落去，但係我知道自己已無勝算。
 
『丫……』大獲，我行錯棋，唔小心突左個將軍出黎，阿風只有將隻馬行前就可以將死我，我就會輸。
 
『嘿。』阿風微笑。佢將隻馬示意行前，但望一望我後，又將隻馬放回原位，再行另一隻棋，點解佢咁做?
 
『想我將你軍? 想就咁結束? 無咁易，我要剥你光豬。』阿風以一個敵視眼光望住我。
 
『你.......』我實在唔知點回應佢，正如佢所說，我真係好想快D結束盤棋。
 
『阿風，唔好哂時間啦。你已經嬴左架啦。』阿靜聽到阿風所說，覺得有點過火。
 
『得，叫阿明佢認輸囉。我想親耳聽下阿明講"認輸"依兩隻字。』阿風個態度突然轉哂，之前局數1比1個陣，阿風擔心可能會輸，所以態度一直客客氣氣，如今大局已定，阿風就想食住個勢，落井下石，打擊阿明自信，因為佢知道依個棋嬴輸唔重要，重要既係要帶出一個訊息比阿明知，佢係唔夠阿風鬥，包括之後落黎既學生會選舉。
 
『阿明，算啦，不如認輸啦。』阿靜勸我說，因為佢覺得咁樣實在難堪，如其比阿風慢慢玩弄，倒不如聽阿風所講，認輸。
 
荒謬!!!荒謬!!!!!
 
我腦海不斷出現依兩隻詞，我從來都無諗過件事會發展成咁，琴日我都係答應阿靜既要求，我根本唔理會比賽輸嬴，諗住只係幫佢手撐下埸。但估唔到如今發展到我同阿風既大戰，仲吸引左咁多人黎睇，阿雪同阿靜都係咁，好多人都係到.....好多人....好多人係到睇住......點算......我實在講唔出口，要我認輸根本無可能。
 
手上既棋慢慢比阿風一隻一隻咁食左去，我已經行到無野好行，不斷將D棋移左移右，係到等死咁。
 
身旁既人都開始竊竊私語，我隱若聽到佢地話: 『攪咩呀? 仲唔認輸既? 係到哂時間。』
 
阿雪聽到現埸既人所講，加上我既棋愈黎愈少，盲既都知阿明輸緊，不禁說 :『阿明......不如算啦。』
 
連阿雪都咁講......睇黎我真係無第二條路好行。唯有死死氣咁認輸吧。
 
『我認........』當我準備開口講認輸時。
 
阿風突然說 :『我認輸。』
 
我抬頭望住阿風，驚訝地說: 『咩話?』
 
在埸所有人都即時起哄 :『嘩，做咩係佢認輸架? 做馬架? 』
 
『丫! 我覺得我都係輸左! 哈哈! 恭喜你嬴左呀!阿明!』阿風企起身係我面前拍手掌。
 
我一時之間比唔到反應阿風，現埸既人都起哄得令我有點亂。
 
『阿風你......』阿靜問阿風。
 
『呵欠! 再捉落去都哂時間，佢又唔認輸! 佢咁想嬴，咪比佢嬴囉! 哈哈』阿風笑笑口同阿靜說，但故意將聲線提高黎比我聽到。
 
" 拍 "
 
我拍張枱對住阿風說 :『你咁算係咩意思呀!!』
 
阿風轉身笑住應:『嬴左都咁嬲? 哈哈! 你真係怪。你係咪想試下輸既感覺? 下次選學生會個陣咪比你試下囉! 』說罷，阿風就揮揮手就走左。
 
身旁既人都開始散，大會見到我埸比賽完左，都宣佈晉級既人準備下一回合。
 
而我身旁只剩下阿靜同阿雪。阿風係咁樣算點? 我寧願比佢收皮都唔想佢咁樣做，算點呀? 可憐我?在埸所有人都無一個人認同我係真正既勝利者.....
 
『走吧。』我死死氣對住阿雪講。
 
『嗯......』阿雪知我心情唔好，都無咩點講野，就跟住我行。
 
阿靜見到我想走，就行到我面前 : 『阿明，你晉左級架，你要捉埋落去架。』
 
『晉級? 咩你真係覺得我嬴左咩?』
 
『我..........』阿靜知道阿明比阿風玩弄，內心好難受。但佢咁問都係基於自己係大會既人，都係照規矩問下阿明。
 
『阿風真係屈機.......』說罷，我就同阿雪走左。
 
『阿明.......』阿靜望住阿明既身影，內心說不出的難受。
 
我同阿雪離開左校舍後，一直沉默著。阿雪見到我咁，唯有安慰下我
 
『捉棋之嘛。又唔係D咩事，我地係學生會嬴返佢一次咪得! 我一定撐你架!!』阿雪輕輕捉住我既手說。
 
阿雪隻手好溫柔，天氣已經夠凍，加上岩岩係阿風玩完，個人都灰到冷冷冰冰咁，突然間阿雪咁樣捉一捉我，突然有股溫柔由隻手到散佈全身每一度地方。
 
我對住個天唉左一聲之後，就望住阿雪: 『你岩，捉棋之嘛。下次係學生會先係真正既對決，到時嬴佢都未遲!』
 
『岩! 我地要同心合力! 打低佢! 我本來唔識佢架! 依家終於見識到佢個人有幾衰! 都好明白點解你會退莊!!』 阿雪有點激氣，但佢激氣既樣唔知點解又有D好笑。
 
『喂喂! 又話睇戲既? 之前講講下 好似無左件事咁，你記唔記得架?』 阿雪問，順便扯開話題講返D開心野。
 
『星期日呀嘛，我記得架。』
 
『哼! 算你啦! 』
 
Whatsapp提示聲響起。
 
阿靜:
阿明...你點呀? 一陣完左個活動之後，我搵你好唔好?
 
『係呢? 你返hall定點? 我要返屋企先，一陣出去幫人補習。』阿雪問。
 
我望一望阿靜既Msg，諗左一陣。就同阿雪講 : 『我返hall，你行先吧。』
 
『OK!拜! 有咩call 我! 撐你!』阿雪遞起個大拇指比我後，就離開了。
 
拜別左阿雪之後，突然間感到好空虛，其實我唔係想返Hall，只係想等埋阿靜出黎，如果唔係我就陪阿雪返屋企仲好。
 
坐係路旁既長椅，天氣真係好凍，望望撻地，岩岩落完雨，吹起黎既風仲更加覺得有D濕濕地。呆呆望住D同學仔係到行，呆呆住望住地下，真係好呆。明明只係輸左一盤棋姐，好似輸左成副身家咁，攪咩呀......
不過個腦一諗起阿雪既支持，我又覺得無咩野，諗落好似仲賺左。
 
『阿明…..你點呀...』阿靜喘住氣咁走埋黎。
 
『嘩.....你洗唔洗跑黎呀!? 坐低先。』望住咁心急既阿靜，睇落佢真係幾關心我。
 
阿靜吸了淡氣，慢慢定一定神，轉頭對我說 :『我冇諗過件事會攪成咁......Sorry。』
 
『算啦，又唔係D咩大事，捉棋姐。』
 
『你唔介意就好.......』
 
『係呢......點解阿風會黎既?』
 
『其實我咩人都會叫黎，因為我驚真係無咩人黎，所以咪叫多D人....撐下埸咁。』
 
『咁真係個天要注定我同阿風要鬥.....無計! 哈! 佢真係屈機!』
 
『............』阿靜望住我個樣好似咁輕鬆，一時之間唔知講咩好，本來阿靜見到阿明個樣好似好灰咁，好擔心阿明，但依家見到阿明好似突然間無事咁。
 
兩個人坐埋一齊，但一直沉默住。
 
當我見到路邊一對對拍住拖既中大學生，突然覺得有點酸，葡萄吧?
 
『其實入到大學，真係好應該試下拍拖，你話係唔係?』我對阿靜說。
 
『咁......都要搵岩人先可以拍拖既......』
 
『岩.....不過阿風應該同你表白過，係咪?』我將琴晚既問題再問一次。
 
『點解你係咁問阿風D野既?』
 
『除左佢咁明顯追你，仲有第二個?』
 
『佢係有表白，但我冇答應，我......唉....我唔知。』阿靜似乎有苦衷。阿風依個人咁屈機，比個屈機男追，仲唔狗衝? 仲可以惡到拒絕對方。不過從依句睇到，加上阿靜吞吞吐吐，唔通阿靜真正鐘意既人係我? 如果唔係仲有D咩理由令到阿靜唔揀阿風?
 
『唔知就算啦。我轉過話題，黎近我同阿風參選學生會，你自己都有一票，到時你會投邊個?』我覺得依句設定得唔錯，其實岩岩捉棋我就好想問阿靜究竟佢會支持邊個，我好想知道阿靜既想法。
 
『我會揀你。』阿靜諗都唔諗就答左。
 
『你會揀我?』我心入面係到暗爽緊，同時暗說一句 " 收皮啦 阿風 "。
 
『咁如果....你同佢叫我揀，我梗係揀你啦。我話哂識左你咁耐，我同阿風只係識左半年左右咋。』
 
『多謝你既....神聖一票。』雖然我好想阿靜揀我既原因係鐘意我，但我都知道阿靜唔會咁講，佢將揀我既原因推落"識我識得耐"，我又真係唔知佢真定假。不過都好開心佢會揀我。
 
『你呢.......頭先我見到個個女仔幾靚呀! 仲一直陪住你......』
 
聽落阿靜好似呻醋咁，但見到阿靜呻醋個樣真係好可愛，同時間覺得有個女仔呻我醋個感覺真係好正。自我感覺非常良好。
 
『佢係我同學，咁岩叫佢黎睇姐。』
 
『佢咁靚.......又白......隻腳又長，岩哂你啦。』
 
『你夠白啦，你夠岩我。』
 
『咁如果.....我同佢都參選學生會，你又有一票，你會揀邊個?』阿靜用返我問題，再問我一次。
 
『我一定會揀你。』我諗都無諗就答左。
 
丫........突然個腦閃左一閃，當阿靜咁問我既時侯，我個腦海第一個浮現既人就係阿靜，係因為我眼前個個係阿靜，我無意識咁自然會答阿靜，但如果阿雪問我，我可能會浮現既人係阿雪，而唔係阿靜，所答既答案都唔會係阿靜，即係我見邊個問，我就答邊個。 既然我有依個感覺，咁阿靜呢? 阿靜揀我係唔係因為咁? 定係我自己諗多左?
 
當阿靜聽到後，怕怕羞羞咁答 : 『多謝。』
 
『嗯........』本來心情一直暗爽緊，突然間因為個條問題令我思緒有D亂，我仍然攪唔清阿靜既想法，我都攪唔清我地關係仲係點。
 
『係呢，阿明.....你發唔發覺一樣野。』
 
『咩?』
 
『就係我地....傾計個陣，你對我講既野愈黎愈冷淡，以前既你對住我，好多好多野講，但依家既你......好似…..幾句幾句咁就算。』阿靜似乎留意到我自己對佢唔同左。
 
『係咩.......』我沉住回應，我腦海係到浮現出過去半年所發生既事，令到我同阿靜之間既關係變得好快。
 
『以前我都唔出聲，靜靜咁聽你講野......依家反而我講得仲多野過你。你係咪有D事?』
 
原來阿靜覺得我變左，係因為發生左D事係我身上.....但我點講得出，我係因為你?
 
『都開始夜，我要返去買餸，你今晚......黎唔黎我到食?』阿靜見個氣氛好似變得好彊咁，唯有打圓埸。
 
我知道今日屋企人會係屋企，所以應該煮左飯，但依刻我又唔想返屋企。
 
『唔啦，我返Hall。』
 
『咁好啦，我希望你可以變返以前既阿明!嘻!』阿靜輕輕拍一拍我。
 
而我望住阿靜，好想講一句: 『我都好希望你可以變返以前既阿靜......』但我講唔出口。
 
拜別左阿靜後，我獨自一個行返上Hall，路程好長，但我完全唔覺我累，反而一路行一路諗返岩岩同阿靜既對話。
 
事實上，我對阿靜係變左，係因為我鐘意左佢。
 
以前對住阿靜，我可以咩都講得出，咩都可以做，什至拎部相機係面前影佢對腳，仲可以偷偷地抽下佢水。係因為我對阿靜無意思，當左佢係我既好朋友，一個由細玩到大既好朋友，我可以完全唔洗避忌。
 
但依家已經唔同左，我對住阿靜好有避忌，我每同佢講野，我都驚自己講錯說話，好驚係阿靜面前扣分，好驚會影響到我係阿靜心目中既地位，自此之後，我係佢面前就變得好龜縮，好內向，我係阿靜面前，我做唔返自己。就好似佢係我心目中既女神咁，神聖不可侵犯，係佢面前我唔可以做出過份既行為同言語。
 
但既然我既行為已經反映出黎，即係代表我心中其實真係鐘意左阿靜。
 
唉，突然間覺得自己原來唔係咁Care阿雪，只係因為佢性格好，樣靚就想追，但完全唔係一個鐘意既心去對待佢。
 
過幾日就星期日，我約左阿雪去睇戲，一個只有我同佢既單獨約會，本來我想好好組織一下同佈署，但依一刻，我完全無咁既意欲去做。唉，但我又想得到阿雪.......不過.......唉! 我真係唔知自己想點。
 
返到Hall後，聽到門內傳出D呻吟聲，我就知我室友同佢女友做緊愛，我都唔記得左之前佢叫我唔好咁早返，我仲叫佢放心慢慢扑野，我唔會返Hall。佢一定以為我唔返黎，慢慢同佢女友玩。
 
企係門外，聽住D微弱既呻吟聲，腦海既性幻想對像一諗就諗起阿雪，而唔係阿靜。當我試下將性幻想轉向阿靜時侯，我突然腦海係有一個念頭: " STOP" 。我突然間覺得好有罪惡感，我點可以將阿靜當成性幻想對像? 我做唔到。但......我又可以諗阿雪.....咁....姐係代表咩?
 
************************************************************