《我應承過一個女仔，要帶佢去修頓球場睇我比賽》: 第一話

整個中學裡頭，籃球佔據了我青春的大部分，我的所有故事，都因籃球而起。
 
也有那一個女孩。
 
「喂！阿文，放學打波？」由中二開始，這群波友已經進入了我的生命，影響我的生命，每逢放學、假期，就往球場跑。
 
「好啊！球場等。」我答應後，阿基就離開我班房，去找其他人了。
 
讀書對我來說，只是完成學校給我的任務，而籃球，才是我的使命。
 




放學後，我們幾個大男孩戰到天昏地暗，學校兩旁的燈照不進入球場，只有夠在僅餘的光線下摸索，即使能夠隱隱約約看得見球，但打得十分辛苦和吃力。
 
但我們沒有一人想離開，因為不捨得。
 
最終，我們輸給了校工。
 
「如果我哋有校隊，就可以光明正大咁留係學校練波啦。」一支維他奶，是我們波後的活動。
 
「點解我哋學校無校隊咁戇鳩㗎？」阿基這句怨言已經講了不下十次。
 




「話之前校隊同其他學校打交啊嘛，自此之後就廢咗籃球隊。」肥恆也跟著不忿。
 
「好想打校隊啊⋯⋯」這是我們一伙人的目標，很多次茶餘飯後，都訴說著這個夢想。
 
「到時候一定好多女嚟睇我哋比賽，著曬短裙仔咁幫我哋打氣！」奀皮仔沈溺在自己的幻想世界中，出不了來。
 
「然後係場面，含情脈脈咁遞水俾我哋⋯⋯」光仔跟著奀皮仔一同幻想。
 
「不如我哋聽日真係直接同校長講啊？」這件事，已經令我按耐不住心中的衝動了，「好無啊？」
 




「吓？認真咩？」一雙雙不可置信、刻著「咁突然？」的表情。
 
「真啊！再唔行動，我哋得返B grade同埋A grade打咋，我哋下年仲要係大B，越遲行動，我哋打得就越少⋯⋯」我認真估算一下，真的好像差不多了。
 
「好似都係，但會唔會急咗啲啊？」光仔似乎還沒有心理準備。
 
「好！一於聽日就隡上去！同個八婆校長講！」這幫人中，只有阿基力挺我到底。
 
「好兄弟！！」我在7-11裡面大喂一聲，嚇到旁邊進來買飲品的妹妹仔。
 
身穿我們學校的校服，望一望，好似是與我們同級的，感覺有點面善⋯⋯
 
但一時三刻想不起名字來，長得頗清秀，綁著兩條小孖辮。
 
我們轉移場地，在學校附近的公園閒逛，商量一下明天的大計就各自回家。




 
明天小息，集合了我們幾個人，來到校長室門外，校長室門口有一個透明玻璃窗口，可以窺探到裡頭。
 
校長不在裡面。
 
「喂⋯⋯咁點算啊？校長條八婆唔係度喎。」我們公然在校長室門外講校長的壞話。
 
「一係一陣再嚟睇下囉，可能咁啱唔係度姐。」光仔說得頗有道理，然後我們迅速四散。
 
下一個小息，校長仍然不在這裡，我們在校長室門外徘徊了一段時間，各自也不知道怎麼算，校長不在這可不是在我們的預料之內。
 
「喂！你哋幾個係校長室門外面做咩啊？鬼鬼鼠鼠咁。」糟糕，好死不死，是訓導老師李Sir。
 
全校最惡的老師。
 




「我哋？我哋有事搵校長傾啊。」奀皮立即變得有禮貌起來，數他最「精甩尾」。
 
「咩事？」李Sir嚴肅地問。
 
「我哋想重建校隊。」血氣方剛的我們，不知天高地厚地說。
 
「咪玩啦，校隊荒廢咁多年，唔係你哋話重建就重建。」李Sir一口回絕我們。
 
「我哋下定決心㗎啦，我哋可以嘅時間已經唔多。」我心急地說。
 
李Sir沒有作聲，瞪著我們幾個，神情嚴肅。
 
「做咩姐？我哋認真㗎！我⋯⋯我哋教⋯教練都搵埋啦！！」我亂吹。
 
「喂⋯⋯」後面的幾個豬隊友喝止我。




 
「好似你哋咁樣，就算校隊開返，你哋都一樣唔打得幾耐。」李Sir狠狠地說。
 
「你又知？打都未打過，你就知啦？」奀皮被李Sir那一句點著了，幾分鐘前還恭恭敬敬的。
 
「睇都睇得出啦，你哋返去啦，唔好曬心機啦。」李Sir說完，就插著褲袋走了。
 
我們呆在原地，心中的憤怒無從宣泄。