《嗰晚，女神竟然攻擊我嘅Coin Master村莊》: 女｜girl

(…)
 
「軒哥！🤪」來自嘉盈的私訊。
 
「Hi😂」
 
「搵我有事？」我問。
 
「冇啊，諗住問你同咗啊生講未？🤫」她說。
 




「講咗喇，佢話佢會等喎😎」我說。
 
「咁就好，嚟緊應該有飯食😋」她說。
 
「正，要諗定食咩好嘢！」我說。
 
「冇錯！佢要多謝我同你依兩個媒人🤩」她說。
 
「媒人定花生友😂」我說。
 




「頂你！」她說。
 
就這樣，我和她開展了激情的對話。由小到大都沒有想像過可以和一個女生如此投契，每晚最少聊到凌晨四點，到第二天醒來再繼續。數天下來，我對嘉盈也有了一個頗為細緻的認識。
 
對於愛情：
 
「最緊要啱Feel，唔啱Feel真係講咩都冇用😌」
 
「不過啱Feel都要遇啱時間，如果唔係變咗對的人錯的時間，果下心情真係呢！」
 




「所以我成日都話，做朋友好過做情侶，做朋友唔使諗咁多，同埋食我啲小姐脾氣😏」
 
「最好呢，佢就係打開籃球，同高過我，大隻，靚仔，就完美😂」
 
「你話難唔難搵，我又真係好難答你，但我覺得要出現嘅就點都會出現😋」
 
對於家人：
 
「梗係Family come first喇，真係冇得傾☺️」
 
「你話揀男朋友定屋企人，一定係屋企人！」
 
「屋企人都嚴㗎，晏返要同佢地講，不過明嘅，屋企得我一個女😬」
 
「我Daddy勁錫我，啲人成日話個女係老豆嘅前世情人，依家我信啊☺️」




 
對於朋友：
 
「朋友對我嚟講都好重要☺️」
 
「雖然你睇落我好似好多朋友咁，但其實真係傾到計嘅唔多😢」
 
「唔知係咪因為我同你都好夾，所以感覺可以同你講心底說話😝」
 
「講真你都係唯一一個可以同我傾到咁多嘢嘅男仔😂」
 
「比你聽首歌，蘇眉，好似講緊我地😝」
 
如同嘉盈所言，我和她太過相似，所以很容易會了解大家，明白大家。
 




「軒哥，依排你搞咩，晚晚都咁夜瞓嘅，識左新女啊？」啊生問。
 
那時我和嘉盈才認識了一個多星期。
 
「唔係啊～」我說。
 
「屌你喇，晚晚咁風騷覆message，又同人傾電話！」啊生說。
 
「Friend嚟姐！」我說。
 
「Friend？又唔見你同我咁傾？係咪嘉盈啊？」啊生說。
 
「係啊～」我沒有隱瞞。
 
「嘩，真係佢！屌你重快過我同雅欣，依家發展成點？快啲講嚟聽吓～」我和嘉盈的關係挑起了啊生的好奇心。




 
然後我就將和嘉盈相處的情況告訴了啊生。
 
「掂喇！佢應該對你有啲嘢喎！」啊生說。
 
「唔好玩喇，都話淨係Friend囉！」我說。
 
但心底裡卻有一絲期盼，期盼啊生所說的是事實。
 
「晚晚秒覆你，同你傾電話，又肯講自己嘅事，咁都冇嘢我就真係唔信！」啊生笑說。
 
「我同佢只係蘇眉！」我說。
 
「WTF！？咩嚟？食得㗎？」啊生疑惑。
 




「屌你唔係啊，英文Soul mate啊，即係…即係靈魂伴侶？」我試著解釋。
 
「靈魂伴侶？唔好玩喇，能成為密友大概總帶著愛啊！就算比你講啱，佢對你真係冇嘢，咁你呢？」啊生說。
 
「我…」我猶豫。
 
「那，都話咗你㗎喇！」啊生說。
 
「我同佢的確係好夾，但唔代表啱拍拖㗎嘛。」我說。
 
「咁依個又真係要相處落先知嘅…」啊生說。
 
「咁你有冇約佢出去啊？」啊生追問。
 
「咁又冇喎…」我說。
 
「攞你電話嚟～」啊生說。
 
「做咩先？」我疑慮。
 
「咩做咩，幫你約佢囉，唔好話做兄弟嘅唔幫你，睇你個樣約到下世都未約到～」啊生笑說。
 
「頂你喇！我自己搞掂！」我說。
 
「咁你約啊！」啊生說。
 
面對啊生的步步進逼，加上我內心的驅使，我在和她的對話框中輸入了以下的訊息。
 
「聽日得閒出嚟？😝」
 
然後打開喇叭，播放那首形容著我們關係的歌，等待她的回覆。
 
🎵🎶
 
愛的書我愛的歌 你的喜好太近似
對望就如照鏡子 笑不出我喊不出
人群只有你會意 我不需暗示也可以
所有情人難及你敏感 體恤我比較脆弱 填補我淚痕
 
🎵🎶
 
叮～
 
「做咩先，聽日我Free啊😏」來自嘉盈的回覆。
 
 
我只怕戀上了你 無從後退 承擔包袱不少 忘掉興趣 怕跨出界線 進入了禁飛區 擔心有熱愛磨難 避免心碎 只有得你這個靈魂伴侶 無私的愛超出愛侶 身邊 數百萬一雙一對 和你是唯一的一對 － 蘇眉

歡迎大家follow我ig：9.shoots，果邊同連登會更新得快啲，同埋會容易覆到大家嘅留言，大家嘅follow同like都係我寫落去嘅動力嚟㗎！！！！

P.S. 更新情況睇進度，應該會每日更新，除咗星期六日，聽朝10點！