《有一日，我同拍拖十年嘅佢講分手。》/《初戀3650天》: 第九章中 「漆黑裡看似無晨曦 糟蹋蜜月期 很痛恨自己 得愛情去養活你」 〈窮小子〉

https://youtu.be/V9avzVX0GCc
第九章「漆黑裡看似無晨曦 糟蹋蜜月期很痛恨自己 得愛情去養活你」〈窮小子〉「頭先套戲真係唔睇到最後都唔知邊個係兇手，個編劇真係好犀利！」Jessie一邊吃着壽司一邊問道。

         「係咩，我覺得中間有啲悶就真。」

         「邊到悶，你唔識欣賞就真，你頭先仲睇到訓着，曬晒套戲啦。」

         「我邊有瞓着呀，我咁啱嗰下眨眼比你見到咋嘛。」James把唯一可以吃的鰻魚壽司放進口。

         「你明明就訓着咗，肯定係嫌我揀嘅戲好悶啦。」Jessie故意這樣說道。





         「邊係呢，寶貝有眼光呀，套戲不知幾精彩，我有睇架。」

         「咁究竟邊個係兇手呀？」

         仆街啦，幾乎由頭訓到尾，鬼知邊個係兇手？James心想，唉，死就死啦，說：「個藍色衫嘅男人？」

         「呃⋯⋯唔完全係。」

         咩叫唔完全係？James心想，瞪大雙眼驚訝地看着Jessie。





         「都話你無專心睇架啦，難得同我睇套戲都唔專心，曬晒啲錢啦。」Jessie不滿地說。

         我一早話咗我唔想睇依套，係你係都要我同你睇，James心想，卻還是說：「我試探你有無專心聽我講野姐，我緊係知唔係啦，喔，我知啦，嗰個粉紅色衫女人呀嘛，成日笑，肯定係佢，笑裏藏刀！」

         Jessie搖搖頭。

         「依啲野一陣先講啦，一陣啲壽司凍晒就唔好食架啦。」James說，想要夾塊壽司來吃，卻發現僅有的幾件鰻魚壽司早已被吃掉，頓時無從下口，改口道：「唉哎，肚痛添，我去個廁所先呀。」

         逃避我問題，Jessie瞇起眼睛看着James，James連忙轉身逃往洗手間。





         「叮！」就在James轉身後幾秒，他手機的信息聲音便響起。

         看着James遠走的背影，Jessie伸出手想要拿起James的手機來看，卻又猶豫了，手懸在半空，彷彿進退兩難。

         「叮！」而當她準備把手縮回時，手機的訊息聲竟再次響起。

         事無不可對人言，佢又唔係身有屎，裏面應該無野係我唔可以知嘅，Jessie心想，終於忍不住拿起來，輕易用Face ID便解鎖了手機，點開他與Candy的WhatsApp對話來看：

「上次個西客上咗黎搵你！」
「點算好？」「想死咩。」
「好彩老細係到，搞掂咗姐。」
「嚇死寶寶T-T。」「你今日放假有咩做？」「你就好，我都想放假。」
「嗚嗚。」再往上滑，對話仍主要圍繞工作，雖然有時候，對方會傳些日常生活照給James，可James也沒有再像以前一樣熱情地回覆。





         人地都唔理你啦，做咩仲係咁Send相比James，Jessie愈看愈生氣，不明白James明明已回覆得非常冷淡，為甚麼她還能沒完沒了的說下去？——一隻巴掌拍不響，會不會⋯⋯
         然而，就在這時候，James突然出現在Jessie面前，故作着緊地說「哎呀，比你睇到啲唔應該睇嘅野添！」

         「你唔係⋯⋯肚痛架啦？」Jessie有點心虛地左顧右盼道。

         「係呀，行到一半發現無攞手機咪返翻黎。點呀，有無比你發現到啲咩？」

         「唔知喎，拿，攞去去廁所啦。」Jessie把手機遞回James手上。

        
         過了一會兒，James回到座位上。

         「佢做咩係咁Send相比你，又同你分享咁多野。」





         「我點知，佢要Send我都阻止唔到架。」James無奈道。

         「我唔鍾意佢，佢肯定有問題！」Jessie嘟着嘴巴說。

         「咩問題？」

         「無啦啦一個女仔點會同個男仔分享咁多自己嘅日常？我係佢就唔會啦，佢仲唔係有野！？」

         「你擔心⋯⋯我比佢搶走，你呷醋呀？」James笑着說。

         「係都你擔心先啦。你講，除咗WhatsApp，平時返工你有無成日同佢傾偈？！」Jessie質問道。

         「我同佢個位隔十萬九千里，仲咁忙，日日都OT，仲邊得閒同佢傾偈？」

         「真定假架？你會唔會陽奉陰違架？」Jessie帶點懷疑地問道。





         「陽奉陰違？姐係點？」James不解地問道。

         「姐係講一套做一套囉，表面上聽我講唔再同佢傾偈，實際上無咁做囉，你會唔會⋯⋯Del咗Message我唔知架？」

         「我Del Message？」James無奈地反問道。

         你究竟有幾信唔過我？James心想，明明他已經冷淡回覆，明明他已經抽最多的時間陪她，為甚麼她還是不相信他？

         他失望，也氣餒，卻也覺得她的懷疑亦是無可厚非。

         畢竟自從他出軌那天起，他的一字一句不管是真話還是假話，都不再值得信任。要是別的女生，應該早就離開了吧？只有她這麼笨，還繼續留在他身邊。

所以不管她的懷疑合理與否，他都願意接受。    





         「我要DEL就一句都唔會比你睇到啦，信我啦好無？」James摸着Jessie的頭說。

         「唔得，同工作無關嘅，你都唔可以覆，Emoji都唔可以！」

         「吓，但佢始終都係我同事，唔係咁好嘅。」

         「唔得，最多比你覆三個點點點啦。」

         「好好好，點點點就點點點啦。」James無奈地說。

         「拿你話架，無得反口呀！」Jessie再三強調。

         「嗯。」

         這一句「嗯」沒有一點重量，彷彿下一秒就能被風吹走，Jessie的內心依然不安，畢竟曾經他也答應過永遠也只愛她，可最後還是為了別個她而選擇了離開。

她清楚知道他的話不能盡信，即使能夠她也無法做到——她實在想不到能令自己有安全感的辦法。

         既然如此，那就不要再深究，得過就且過吧。

         「你琴晚同邊個去食飯？食得咁豐富。」James問道。

         Jessie昨晚與母親的朋友一起吃飯，不過幾個人卻輕易吃掉好幾千塊。Jessie只把豐富的美酒佳餚拍進了IG Story，卻不見席間的主人公。

         James不知道，Jessie是故意的。

         「無呀，同媽咪同佢啲朋友咋嘛。」Jessie淡淡地回應道，想要把這話題帶過。

         「不如我地儲錢買樓。」、「不如我辭職囉。」二人幾乎同步說出這兩句話。

         「無啦啦⋯⋯做咩要辭職？」Jessie驚訝地問道。

         「我轉咗工咪可以有多啲時間陪你。」James說。

         「你搵好工啦？點解我唔知嘅？」

         「未呀，我諗住抖一排先搵。」

         「咁你咪姐係裸辭？」Jessie難以置信地問道。

         Jessie從來不做任何不確定的事，對於James這麼冒險的決定，她感到不安。

         「我係咪好唔成熟？但係我真係好攰，好辛苦。」James嘆氣道。

         James的說話讓Jessie想起他每天只有上班，沒有下班的生活模式，而這種模式持續了將近大半年。

         她好像很久沒聽過他說要打機，取而代之的是嘆氣和疲累。他的神眼也不再閃爍，如鋪了一層灰，過了很久也沒有人打理，漸漸的讓人都快忘了它本來的模樣。

         曾經那雙眼睛是那麼靈動，彷彿能說話，總能從他裏看到綿綿愛意。

         記得中學時，那時還是中一，James因為調皮，被安排坐第一行的角落位置，而他總喜歡回頭盯着Jessie看，尤其是閱讀課，無心讀書的他看到文字便會入眠，Jessie就成了他最佳的提神藥。

         而不知從甚麼時候開始，她竟成了他的壓力來源之一，那種不知不覺，連他自己也不發現。

         「唔係嘅，咁你返工又真係好攰，好辛苦。」Jessie心疼地看着James說。

Jessie也知道，James說的沒有錯，只有辭職才是解決他那揮之不去的疲態的唯一辦法。

「咁你贊唔贊成我辭職？」James問道。

Jessie猶豫，一時之間不知該如何回答。

若她說贊成，那就與她的目標背道而馳——儲錢買樓，證明給她母親看，James並非她想像的不滯，他是有能力給她幸福的。然而，這卻又太殘忍，她並不想逼死他。

可是，疫情之下，一旦辭職，要再找一份工作實在不容易。

Jessie糾結，內心的魔鬼與天使反覆來回糾纏。

「如果我話唔贊成呢？」

「你真係覺得我唔應該辭職？」

「唔係嘅，我之前都有叫過你辭職，而且你咁辛苦，我都好贊成你應該辭職，但⋯⋯依家疫情，我擔心你無咁容易搵過另一份工。」

「嗯，咁算啦，當我無講過。」James眼神裏的唯一一絲希望瞬間熄滅，眼神無力地看着地板。

看到James這模樣，Jessie更是心疼，連忙說：「唔係，如果你真係覺得好想辭職，咁你咪辭囉，我只係講出你依個決定應該要考慮嘅因素。話晒你嘅人生都係你自己嘅，無人有權力阻止你做任何野，或者幫你做任何決定，我最多只可以比意見你，而你都絕對可以唔接受，我絕對OK架，我相信你做嘅任何決定。」Jessie握着James的手臂，希望他能接收到她對他的信心。
「唔係架，你講嘅野每次都係啱嘅，由一開頭你叫我努力讀書，叫我同你一齊入大學，叫我轉工⋯⋯每一次我無聽你講，每一次到最後，事實都證明你講嘅野係啱嘅⋯⋯」James黯然道。

愈看到James沮喪的樣子，Jessie愈不願意看到他繼續被工作折磨得不再像從前的他。

明明他曾經那麼開朗活潑，總在她失意時逗她笑，腦裏盡是奇怪的想法，那個無憂無慮的他是甚麼時候被歲月磨滅了？

她不願看到他連最後一絲笑容都被現實奪去。比起向任何人證明他的能力，她更想他快樂。

「唔係架，如果你覺得辭職會舒服啲，就辭職啦，你做咩決定我都會咁支持你。」Jessie更用力握緊James的手臂。

「你真係支持我辭職？你唔會覺得我咁做好唔成熟咩？」

「只要你覺得舒服啲，開心啲，就去做啦。」Jessie摸着James的頭，對他笑着說。

看着這笑容，James內心感到一股暖流。

可惜，稍瞬即逝——「你有儲蓄架嘛。」Jessie說，「平時你都無點洗錢，只要我地慳啲洗，儲儲埋埋啲錢應該夠你用嘅，抖夠咪再搵工囉，你咁叻，我相信你一定搵到嘅。」

儲蓄？哈，James感到可笑，可是他不敢坦白，尤其當從Jessie的眼睛裏，看到那滿溢的愛，多得連他也覺得盲目的愛⋯⋯

而只有他知道，不，應該全世界也知道，唯獨笨拙的Jessie不知道，他根本不配。

James突然緊抱Jessie，說：「對唔住。」

Jessie受寵若驚，還是伸手緊抱James，撫着他的背，笑着問道：「做咩無啦啦同我講對唔住？你返工咁辛苦，辭職都好正常呀。」

「你有啲咩想做？辭咗職之後，我可以每一日都陪你做你想做嘅野。」

「每一日呀？日日都見我，唔悶咩？唔洗打機啦你？」雖然Jessie口裏這樣說，心裏卻感到甜蜜。

「對住你點會悶，可以嘅話我想每一日擘大眼見到嘅第一個就係你。」James把頭埋在Jessie的肩磅裏，把她抱得更緊。

未來的人生定要有她，每天一起起來，甜言，纏綿，再一起牽手上班，下班，再不用分道揚鑣，而是一起回去那個屬於他們的家。這就是他幸福的模型。

「都係，我咁好。咁你要努力啲啦，唔係一陣比人搶走咗就無架啦。」Jessie甜蜜地說道。

而Jessie不知道，她的好竟會成為他壓力的來源，到最後，他只想從她身邊逃去。