分手後，遇上你: 為了愛

電視劇成日演到人，只要哄下個女仔，之後就可以同番個女仔一齊。但現實生活，又點會咁容昜丫。我自從答應左Jessica之後，每日基本上都係向書本間渡過，做唔完既練習，温唔完既書，學唔完既知識，到底人既一生，應該追求咩野，而應該且利用咩方法去追求。
我追求愛，追求Jessica對我既愛，我唔知道追求到佢既時候，佢個心仲會唔會係屬於我，但我知道，如果我唔去嘗試追求番佢，我一定會後悔，所以哪怕接下落黎會幾辛苦，我都要支持落去。今日應該係我温書大計開始既第二十一日，直至今日，我完成既練習加埋應該有半米高，可惜依然冇把握合格，但確實太攰，訓左係床到，無無聊聊打開手機，打開whatsapp，將我同Jessica以前既一切對話，由頭睇一次。
正當我睇到我地第一次見面之後既對話，Jessica突然揾我，「咁得閒上線丫，做咩咁耐唔上線，又唔揾我，死左去邊黎？」，我係到諗，唔係我唔想揾你，而只係我根本冇時間揾你，「冇丫，自從果日之後就日日都好鬼忙啦，日日係咁對住本書，訓教都冇離開過張枱，所以你睇下我幾忙丫。」Jessica靜左一靜，之後問我「點解你要咁博命？你咁樣會捱壞身體。」我笑左一笑，「因為一切為左愛。」